"Ushtria e Kosovës paraqet vlerat tona, është shtyllë e shtetit" Foto: Koha

"Ushtria e Kosovës paraqet vlerat tona, është shtyllë e shtetit"

14 dhjetor 2018 17:26

Presidenti i Kosovës Hashim Thaçi, në ceremoninë qendrore për transformimin e FSK-së i ka uruar ushtrinë çdo pjesëtari të FSK-së, çdo qytetari të Kosovës, derisa ka shprehur nderimet më të thella për çdo dëshmor që ka dhënë jetën që ne të gëzojmë edhe këtë ditë.

“Sot përmbyllëm një proces të nisur para shumë vitesh. Morëm një hap të rëndësishëm drejt përmbylljes së shtetësisë sonë pasi ushtria është shtyllë e shtetit. Kjo është meritë, para së gjithash e çdo pjesëtari të FSK-së, e punës së tyre, e profesionalizmit të vet. Falë kësaj pune është bërë e mundur që të ecim përpara në zgjerimin e mandatit të FSK-së, që të bëhet ushtri e vërtetë e Kosovës”, ka thënë presidenti Thaçi.

Kreu i shtetit, njëherësh Komandant Suprem, ka thënë se FSK-ja sot nuk është vetëm ushtri, por ajo është kthyer në institucionin më të besueshëm në Kosovë.

“Është bërë institucion që më së miri paraqet vlerat e Kosovës, të shoqërisë sonë. Bashkëjetesa, solidariteti, përkushtimi, profesionalizmi, janë vlerat e FSK-së, por edhe të tërë shoqërisë sonë”, ka thënë Thaçi.

Një falënderim të veçantë ka pasur edhe për të gjithë deputetët e Kuvendit të Kosovës, të cilët me votën e tyre sot i hapën rrugë transformimit të FSK-së.

I pari i vendit ka thënë se të bashkuar do të jemi më të fuqishëm dhe do të marrim vendime më të guximshme për Kosovën, për të ardhmen tonë.

“Transformimi i Forcës së Sigurisë së Kosovës do të bëhet në bashkëpunim dhe në koordinim me NATO-n dhe partnerët tanë në botë, të cilët dëshirojnë të ndërtohet paqe e qëndrueshme në Kosovë dhe në rajonin tonë”, ka thënë ai.

Ai ka thënë se gjatë karrierës së tij ka mbajtur poste të ndryshme dhe ka kryer detyra të ndryshme.

“Por, ndër ato që më jep më së shumti nder e kënaqësi është të jem Komandant Suprem i Forcës së Sigurisë së Kosovës”, ka thënë Thaçi.

Presidenti ka thënë se sot shikon drejtë çdo ushtari të FSK-së, pa dallim përkatësie etnike e pa dallim gjinie, duke ditur se ata kanë në zemër Kosovën dhe të mirën tonë dhe të fëmijëve tanë.


Haradinaj: S’ka mik më të mirë dhe armik më të keq se FSK-ja

Kryeministri i Kosovës, Ramush Haradinaj ka thënë se Kosova po hyn si e fundit në rreshtin e ushtrive të botës, dhe ishte koha që ta kishte rreshtin e vet.

E në këtë rresht ai thotë se Kosova po hyn në paqe, dhe e ka për nder të jetë pas Amerikës.

“Rreshti është fjala e parë që e mëson kur bëhesh ushtar. Rreshti për ne ka qenë i mohuar, qe mijëra vjet të tjerët kanë bërë rresht. Ne jemi bërë rresht në krejt ushtritë e botës, po na është mohuar e drejta me qenë në rreshtin tonë. E populli, ndër më të vjetrit në Evropë, i fundit po bëhet me rresht. Ne po vijmë në paqe, po vijmë të fundit në rresht por po hyjmë me paqe. Paqen e kemi fituar me dhimbje, e paqen e kemi fituar me aleatët tonë. Paqes i prinë Amerika, dhe e kemi për nderë me u rreshtuar pas Amerikës”, ka thënë Haradinaj.

Ai ka thënë se s’ka mik më të mirë, por as armik më të keq se FSK-ja. Ai ka cituar gjeneralin amerikan James Mattis, tani sekretar i Mbrojtjes në SHBA.

“Po e citoj një thënie të gjeneralit Mattis, s’ka mik më të mirë se marinsi, por s’ka edhe armik më të keq, edhe unë them se s’ka mik më të mirë se FSK-ja, por edhe armik më të keq. Sot janë gëzuar edhe të vdekurit edhe të gjallët. Edhe ushtarët e Ibrahim Rugovës edhe të Adem Jasharit”, ka thënë Haradinaj.

Ai ka theksuar se ushtria e Kosovës asnjëherë s’do të kthehet kundër popullit të vetë, pa marrë parasysh etnisë së tyre, duke shtuar se serbët do të mbrohen nga ushtria si në jug ashtu edhe në veri të Kosovës.

“S’do të veprojmë që ushtria jonë të kthehet kundër popullit të vet, jo kundër serbëve, si në jug e në veri, ata janë të këtij vendi. Ne s’kemi ardhur te rreshti si të fundit për të rrezikuar të tjerët por për të forcuar paqen. I ftojmë të gjitha ushtritë të bëjmë partneritet për paqen, po filloj me Shqipërinë, e pastaj edhe Malin e Zi, të Maqedonisë, e pse jo edhe ushtrinë e Serbisë siç dëshirojmë edhe paqen me Serbinë. Po ndalem me këtë të fundit Zoti e bekoftë Ushtrinë e Kosovës”, ka thënë ai.


Veseli: Shtetit po i shtohet një ditëlindje e madhe

Kreu i Kuvendit, Kadri Veseli ka thënë se dita në të cilën Kosova e formoi ushtrinë është ditë që brezat që vijnë do ta kujtojnë me krenari.

“Secili prej nesh do ta ketë një kujtim për këtë ditë. Ditëlindjeve të mëdha të shtetit tonë sot po i shtohet edhe një ditëlindje e madhe, ajo e Ushtrisë së Kosovës”, ka thënë Veseli.

Veseli ka thënë se “ne jemi pjesëtarë të një kombi që në gjithë historinë kurrë nuk sulmoi askënd, kurrë nuk zuri vend urrejtja ndaj të tjerëve, nuk ushqyem ideologji në dëm të të tjerëve, edhe pse ishim viktima të ideologjive”.

“Ne besojmë te drejtësia sepse ne kemi luftuar vetëm për drejtësi. Ne kemi qenë dhe jemi në anën e drejtë të historisë, dhe e ardhmja jonë është e sigurt, integrimi në strukturat euroatlantike”, ka thënë Veseli, teksa ka shtuar se Kosova i është përherë mirënjohëse SHBA-së për ndihmën e pakursyer në të gjitha fazat e lirisë dhe pavarësisë së vendit.

“Ushtria e Kosovës do të jetë vazhdim i traditës humane që na bën krenarë para vetes dhe para botës. Një ushtri për veten dhe për botën”, ka thënë Veseli.

Ai ka thënë se uniforma e Ushtrisë së Kosovës do të jetë uniformë nderi për të gjitha komunitetet në Kosovë.

© KOHA. Të gjitha të drejtat janë të rezervuara.

Komentet

Shto koment

Të ngjashme