Demaliaj: Komandant Remi ka dëshmuar në të kaluarën pafajësinë e tij para drejtësisë

Demaliaj: Opozita po synon të minimizojë sukseset e Qeverisë Haradinaj

06 dhjetor 2018 23:37
23:56

Sipas deputetit të AAK-së, Shkumbin Demaliaj, opozita po kërkon zgjedhje të reja për të minimizuar sukseset e Qeverisë Haradinaj.

Në Interaktiv të KTV-së, ai ka thënë se opozita ka humbur kontrollin.

“E kanë humbur kontrollin për shkak ët sukseseve të qeverisë Haradinaj. Liberalizimi s’ka dështuar. Me rëndësi është t’i kryejmë ne obligimet tona, të tjerët le të vazhdojnë me punët e tyre. Po bëhet ushtria. Dështim është Interpoli”, ka thënë ai.

Demaliaj ka përmendur marsin si mundësi për liberalizim vizash, teksa ka shtuar se Kosova ka përmbushur të gjitha obligimet.

E ka quajtur reagim të nxituar deklaratën e vet për ish-prokurorin Elez Blakaj se do të ndiqte vetë nëse shteti nuk vepron. Ka thënë se nuk mund të thotë se i bie pishman sepse ka shtuar se nuk beson që e ka lënduar Blakajn e as nuk ka vend për kërkimfalje.

“Jo me Blakajn, por me asnjë njeri të gjallë s’kam telashe”, ka shtuar ai.

23:49

Demaliaj fton gjithë opozitën të bashkohen në bisedimet me Serbinë

Për sa i përket dialogut Kosovë-Serbi, deputeti i AAK-së Shkumbin Demaliaj, tha se partitë opozitare, PSD-Alternativa, janë ofruar ashtu siç duhet.

“I bëjmë thirrje edhe partive tjera sepse në raport me dialogun me Serbinë duhet të jemi të bashkuar. Ky proces duhet të përfundojë”, tha ai.

Demaliaj tha se duhet krijuar sa më shpejt ekipi negociator e të shkohet në bisedime.

“Roli të presidentit Thaçi ia lejon Kushtetuta, opozita ishte e zëshme që t’i minimizohet roli i tij por ne bashkë duhet t’i prijmë këtij procesi”, tha tutje.

Demaliaj tha se Ahmeti e Limaj, që pritet të jenë në krye të ekipit negociator, duhet të merren vesh se për çka të bisedohet në dialog, por ka thënë se ekipi duhet të fokusohet në çështje nacionale e pjesë e saj të jenë edhe individë nga shoqëria civile.

“Qeveria e Kosovës po diskuton se për çka të bisedohet. Nuk dihet ende se çka do të bisedohet në Bruksel. Edhe në Bruksel edhe në çdo vend do ta mbrojmë Kosovën e 17 shkurtit”, tha ai.

Demaliaj tha se duhen ndryshime kushtetuese, nëse do të duhej të mbrohej ideja e Thaçit për ndryshime territoresh. “Me tokën e Kosovës nuk luhet, s’ka lëvizje kufijsh”.

23:47

Demaliaj: Nuk po krijojmë ushtri për veriun e Kosovës, por për paqe në botë

Deputeti i AAK-së, Shkumbin Demaliaj, ka komentuar edhe zhvillimet e fundit rreth ushtrisë së Kosovës. Ai ka thënë se NATO nuk ka thënë se është kundër, ka shprehur dilema mos nuk është koha.

“Me rëndësi është se sponsorizuesi më i madh i NATO-s, SHBA-ja është pro formimit të Forcave të Armatosura. Deklarata e sotme e ambasadorit amerikan Philip Kosnett, është konfirmim për këtë”, ka thënë ai, në Interaktiv të KTV-së.

Demaliaj ka komentuar edhe deklaratën e nënkryetarit të LDK-së, Lutfi Haziri, që ka thënë se nuk është mirë që Kosova të bëjë hapa pa miratimin e miqve ndërkombëtarë.

“z. Haziri është kryetar komune dhe nuk e ka shansin për ta votuar Ushtrinë e Kosovës. Ai mund të bëjë politikë, por unë besoj që të gjithë deputetët e LDK-së, do ta votojnë Ushtrinë”, ka thënë Demaliaj, që ka thënë se vetëm deklarimi kundër Ushtrisë së Kosovës është gabim.

Kur ka folur për rolin e minoritetit serb në këtë aspekt, deputeti ka thënë se qytetarët serbë të Kosovës “duhet të vetëdijesohen që të mos ndikohen nga klasa politike serbe që çdo veprim të Kosovës e kthen në kërcënim”.

“Qytetarët serbë të Kosovës janë pjesë e FSK-së, kanë qenë deri në kohën kur Serbia ka bërë presion ndaj tyre, ka shkuar e u ka thënë se si bëhesh pjesë e një ushtrie që do t’i vrasë serbët. Pra mendjen e kanë te lufta, e nuk do të jetë ashtu”, ka thënë Demaliaj, përcjell Koha.net.

“E tha edhe Kryeministri, ne nuk jemi duke krijuar ushtri për veri, por për gjithë Kosovën, por do të jetë ushtri edhe për ruajtjen e paqes në botë”, ka thënë ai.

23:37

Demaliaj: Komandant Remi ka dëshmuar në të kaluarën pafajësinë e tij para drejtësisë

Shkumbin Demaliaj, deputet i AAK-së, ka komentuar njoftimin se ish-komandanti i UÇK-së, Rrustem Mustafa - Remi do të jetë i intervistuari i parë i Gjykatës Speciale.

Sipas tij, Remi ka dëshmuar më herët pafajësinë para drejtësisë, pasi ai ishte gjykuar edhe më herët për luftën në Kosovë.

“Sinqerisht, është reagim negativ me këto raste sepse zoti Mustafa edhe më herët ishte pjesë e ndjekjes edhe nga ndërkombëtarët dhe besoj se i ka përfunduar këto raste gjykimi, për të ashtuquajturat krime lufte”, ka thënë ai në Interaktiv të KTV-së.

Ai ka thënë se Kosova e ka obligim t’i përgjigjet Speciales, ndërsa ka shtuar se rasti i Mustafës është i dhimbshëm për shkak të gjykimit të disahershëm.

Demaliaj ka përsëritur se kjo gjykatë është e njëanshme pasi gjykohet vetëm lufta e UÇK-së.

“Krimet që kanë ndodhur këtu nga serbët mbeten të pagjykuara. Është për keqardhje sepse po gjykohemi vetëm ne”, ka thënë ai.

© KOHA. Të gjitha të drejtat janë të rezervuara.

Komentet

Shto koment

Të ngjashme