LDK: Dorëheqja, veprimi i vetëm që i ka mbetur Qeverisë Foto: Koha / ilustrim

LDK e VV kërkojnë seancë të jashtëzakonshme sot për dështimin e vizave

04 December 2018 09:17
11:21

Grupi Parlamentar i Lidhjes Demokratike të Kosovës dhe Grupi Parlamentar i Lëvizjes Vetëvendosje kanë dorëzuar kërkesën për seancë të jashtëzakonshme të Kuvendit lidhur me “dështimet e koalicionit qeverisës, të cilat kulmuan me mosliberalizim të vizave”.

Në një njoftim nga GP i LDK-së, thuhet se dy grupet parlamentare opozitare konsiderojnë se këto dështime kanë krijuar mungesë të besimit të qytetarëve në institucionet e vendit dhe kanë lëkundur besimin e partnerëve ndërkombëtarë në Republikën e Kosovës.

“Kjo situatë nuk mund të vazhdojë më tutje. Qytetarët e Kosovës kanë nevojë për normalitet dhe perspektivë të qartë. Tensionet e krijuara gjatë gjithë këtij mandati qeverisës e kanë pamundësuar debatin substancial në shoqërinë e Kosovës për arsim e shëndetësi më të mirë, për shërbime publike më efikase, për punësim dhe zhvillim ekonomik”, thuhet në njoftim.

Seanca e jashtëzakonshme për të diskutuar këtë çështje është kërkuar të mbahet sot, më 04.12.2018 në ora 16.00.

09:17

LDK: Dorëheqja, veprimi i vetëm që i ka mbetur Qeverisë

Grupi Parlamentar i Lidhjes Demokratike të Kosovës po kërkon seancë të jashtëzakonshme për, siç thotë, dështimet e koalicionit qeverisës që kulmuan me mos liberalizim të vizave.

Përmes një komunikate dërguar mediave, GP i LDK-së thotë se Kryeministri Ramush Haradinaj dhe zëvendësi i tij, Fatmir Limaj, dikur pengonin me dhunë e intriga përmbushjen e kritereve për liberalizim të vizave.

Atëherë, sipas GP të LDK-së, ata e fajësonin Bashkimin Evropian, i cili deklaronte se po rrezikohet liberalizimi i vizave deri pas zgjedhjeve të vitit 2019 në Bashkimin Evropian.

“Sot, kur ai paralajmërim është bërë fakt, përdoruesit e dhunës dhe intrigave, tash bashkë me partnerët e tyre qeverisës, sërish po fajësojnë Bashkimin Evropian. Dështimin në liberalizimin e vizave dhe anëtarësimin në Interpol po e shesin si dështim të Evropës, në rastin e liberalizimit të vizave, dhe të sigurisë globale, në rastin e Interpolit”, thonë deputetët e LDK-së.

Më tej, GP i LDK-së thotë se Kosovës po i mbyllen dyert “sepse udhëhiqet prej njerëzve të izoluar. Këta po mundohen ta shpërthejnë izolimin e tyre, duke e izoluar Kosovën. Por, Kosova dhe qytetarët e saj do ta shpërthejnë izolimin duke i izoluar këta udhëheqës të papërgjegjshëm”.

“Kuvendi duhet të mblidhet në seancë të jashtëzakonshme për të diskutuar këtë çështje. Dorëheqja e tyre është veprimi i vetëm që ju ka mbetur”, ka përfunduar LDK-ja.

© KOHA. Të gjitha të drejtat janë të rezervuara.

Komentet

zeqir07/12/2018 10:33

Ahiiii na lodhet me keto kerkesa,sikurse qeverit paskan faj per mosliberalizim ahiiiiiii.Kur vet e degjut shtrigen e vjeter Evropjane se te gjitha kushtet i kan plotsuar po nuk dojm per inat qe jem shqiptar,per inat qe kem mardhanje ma te mira se ata me SHBA,per inat qe po jau prishim tereqilakun vllazerve te tyre serrb nganjiher.Boll ma me kso jojra femijesh si VV jini ba turp

Shto koment

Të ngjashme