Limaj të rinjve në Shtime: Mos ikni nga Kosova, Perëndimi s’ju pret me lule Foto: KsP

Limaj të rinjve në Shtime: Mos ikni nga Kosova, Perëndimi s’ju pret me lule

19 nëntor 2018 18:11

Nisma Socialdemokrate ka vazhduar aktivitetin e saj për t’u takuar me të rinjtë e partisë. Kësaj radhe nikoqir të kryetarit Limaj kanë qenë të rinjtë e qytetit të Shtimes

Kreu i Nismës, njëherësh zëvendëskryeministri i Kosovës, Fatmir Limaj iu bëri thirrje të rinjve që mos të lëshojnë vendin, pasi siç ka thënë ai, “kudo që shkoni duhet të punoni, sepse perëndimi nuk iu presin me lula”.

Ai tha se përmes platformës së tyre do t’i arrijnë qëllimet e tyre, e që janë vetëpunësimi përmes zanatit.

“Jemi në turin e takimeve me strukturat tona, ideja është për të shpalosur angazhimet dhe përpjekjet tona të përbashkëta, platformës dhe planin tonë, anekënd Kosovës. Ne ende dëshmojmë se nuk e harrojmë atë që e themi. Dy pika kryesore të kësaj platforme janë tema e punësimit dhe stimulimi për vetëpunësim. Të rinjtë e Shtimes duhet të jenë aktivë. Ajo çka ne po promovojmë është që përmes këtij projekti të riaktivizohen të rinjtë. Ne duam që bashkë me ju të fillojmë t’i zgjedhim problemet tona që ballafaqohemi çdo ditë”, tha ai, raporton Ksp.

Kreu i Nismës shtoi se nuk duhet të shahet shteti, pasi që siç tha ai, nëse nuk iu pëlqen kryetari, duhet ndërruar. Limaj tha se të gjithë kanë përgjegjësi në këtë vend sepse, duke i ikur përgjegjësisë, nuk e ndihmojnë askënd.

“Vetëm të organizuar mund t’i arrijmë objektivat e përbashkëta. Ejani të bashkohemi, që secili ta bëjë një punë të mirë për vendin. Nuk është e mjaftueshme vetëm të ëndërrosh, por duhet të punosh që ajo të realizohet. Kam përshtypjen që shumë shpejt ia kemi kthyer shpinën asaj që bota ëndërron, shumë shpejt kemi humbur solidaritetin, ndihmën ndaj njëri-tjetrin”, tha ai.

Limaj përsëriti se nuk është e nevojshme që ta përfundosh fakultetin dhe të punësohesh. Sipas tij, zanati është pikë e mirë referimi.

Ndërsa, Albert Maxhuni, kryetar i Rinisë së Nismës në nivel vendi, ka thënë se fokusi kryesor i këtij turi është që t’i kushtohet rëndësi shkollave profesionale, duke theksuar se Nisma është adresa e vetme e rinisë.

Kurse, Sylejman Krasniqi, kryetari i Rinisë së Nismës në Shtime, ka thënë se Dega e Rinisë në qytetin e tyre i ka arritur qëllimet e veta duke kontribuar për rritje të partisë.

Nisma Socialdemokrate ka filluar që disa javë të takohem më të rinjtë e gjitha qyteteve në Kosovë, sipas tyre, për t’i paraqitur dy pikat kryesore të programit të tyre për vetëpunësim.

Komentet

Shto koment

Të ngjashme