​ AAK dorëzon në PZAP ankesën për Istogun

​ AAK dorëzon në PZAP ankesën për Istogun

22 dhjetor 2017 14:49

Aleanca për Ardhmërinë e Kosovës (AAK), përmes një komunikate për media bën të ditur se ka dorëzuar në PZAP, brenda afateve ligjore ankesën lidhur me shpalljen dhe, siç thotë ajo, shtrembërimin e rezultatit të votës qytetare në zgjedhjet për kryetar të Istogut nga ana e KQZ-së.

AAK, përmes ankesës kundërshton rezultatin zgjedhor të shpallur nga KQZ, dhe i ka bërë kërkesë PZAP-së, që të anulojë rezultatin e shpallur për shkak të shkeljeve të shumta të faktuara në Komunën e Istogut, transmeton Koha.net.

AAK, kërkon që, “komuna e Istogut të shkojë në rivotim dhe të vihet në vend vullneti i qytetarëve të kësaj komune”.

AAK, njofton publikun se ankesa bazohet në këto argumente:

1. Është bërë shkelje serioze e Kushtetutës, konkretisht nenit 45 të Kushtetutës së Republikës së Kosovës, nen ky që garanton të drejtën e secilit qytetar të Kosovës për të ushtruar të drejtën e zgjedhjes dhe votimit.

Përmes largimit të mbi 100 votave të personave që kanë votuar me kusht, të cilët kanë plotësuar moshën 18 vjeç para ditës së zgjedhjeve, KQZ ka bërë shtrembërim të rezultateve dhe ka bërë shkelje serioze të Kushtetutës.

2. Manipulimi, blerja e kundërligjshme e votave dhe presioni në zgjedhjet e fundit në Istog ka qenë përmasave të jashtëzakonshme.

“Këtë e argumentojnë edhe arrestimet e zyrtarëve të LDK-së në ditën e zgjedhjeve si dhe deklarimet publike të personave të ndryshëm e në prani të strukturave të larta të LDK-së, që kanë shpenzuar edhe deri në 50.000 franga për shitblerje të votave, si dhe ushtrimi i presionit te votuesit nga zyrtarët komunal që kanë qenë vëzhgues të zgjedhjeve”, thotë AAK. Zyrtar nga zyra e prokurimit të Komunës së Istogut kanë qenë vëzhgues të një partie të caktuar politike, e ligji në fuqi nuk e lejon që zyrtarët komunal të jenë aktiv në një parti politike e sidomos që në një në proces zgjedhor të përdoren për të ushtruar presion nda votuesve, thekson AAK.

3. Votimi me asistencë, e cila është përdorur si metodë për vërtetimin ee blerjes së votave, e kjo ka ndodh edhe me persona të rinj në moshë që nuk kanë pasur fare nevojë për asistencë, këtë e vërteton edhe raporti I Rrjetit të Organizatave “Demokracia në Veprim” e cila thotë se deri në 20% kanë të votuesve kanë votuar me asistencë.

AAK, beson në veprim serioz dhe të drejtë në respektim të ligjeve dhe Kushtetutës së Kosovës dhe vendosjen e vullnetit të qytetarëve në vend. Për AAK-në, Kushtetuta dhe ligji janë mbi të gjitha dhe askush nuk e ka “tapi” mbajtjen e pushtetit përmes të gjitha llojeve të manipulimeve. AAK, nuk do të lejoj shkeljen e Ligjeve dhe të Kushtetutës së Republikës së Kosvës nga asnjë shkelës apo bandë politike për asnjë lloj qëllimi.

“Ju bëjmë thirrje qytetarëve të Istogut ruajtjen e qetësisë dhe shumë shpejt do të vihet në vend vullneti i tyre për kryetarin e Komunës”, thuhet në komunikatë.

© KOHA. Të gjitha të drejtat janë të rezervuara.

Komentet

Shto koment

Të ngjashme