Istogasit, të gatshëm të votojnë për herë të katërt brenda 6 muajsh

02 dhjetor 2017 19:06

Balotazhi për kryetar të Istogut do të përsëritet më 17 dhjetor.

Kështu ka vendosur Komisioni Qendror i Zgjedhjeve, një ditë pasi Gjykata Supreme konfirmoi vendimin e PZAP-së për përsëritje të rundit të dytë të zgjedhjeve për kryetar në këtë komunë, përkundër ankesave nga LDK-ja e AAK-ja, raporton KTV.

Qytetarët e Istogut thonë se e respektojnë vendimin e PZAP-së për rivotim.

Dhe përkundër zhvleftësimit të votave që hodhën më 19 nëntor, shumica e tyre nuk e kanë humbur entuziazmin.

Edhe të tjerë, që thonë se janë lodhur nga zgjedhjet këtë vit, shprehen të gatshëm të votojnë përsëri pas dy javësh.

Në përsëritjen e balotazhit për kryetar të Istogut do të garojnë Haki Rugova i Lidhjes Demokratike dhe Gani Dreshaj i Aleancës për Ardhmërinë e Kosovës.

Të dy, zyrtarisht, fushatë mund të bëjnë nga 11 deri më 15 dhjetor, ndërsa 16 dhjetori do të jetë heshtje parazgjedhore.

Përderisa në kampin e Rugovës nuk kanë dashur të flasin për rivotimin, Dreshaj ka qenë i paqasshëm në telefonin e tij gjatë ditës së shtunë.

© KOHA. Të gjitha të drejtat janë të rezervuara.

Komentet

Shto koment

Të ngjashme