Haziri kërkon votën për “vazhdimin e punëve të hairit” në Gjilan

Haziri kërkon votën për “vazhdimin e punëve të hairit” në Gjilan

14 nëntor 2017 20:20

Kandidati për kryetar të Gjilanit nga radhët e LDK-së, Lutfi Haziri, tha se dyfishimi i mbështetjes në Velekincë për kandidaturën e tij dhe LDK-në e bën krenar dhe më të përgjegjshëm në punë.

Ai në kuadër të fushatës për balotazh, ka falënderuar Velekincën për mbështetjen e fuqishme më 22 tetor dhe kërkoi dyfishimin e përkrahjes më 19 nëntor.

“LDK është shtëpi e madhe dhe ka vend për të gjithë, prandaj i ftoj edhe ata që kanë pasur hezitime që të na bashkëngjiten për t’i vazhduar punët e hairit”, u shpreh Haziri.

Ai është zotuar se do të vazhdojë me projekte infrastrukturore në pjesën e “Lipovicëve” në Velekincë, sikurse edhe në pjesët tjera të fshatit.

Haziri theksoi se “me investimet e mëdha gjatë mandatit të kaluar, Velekinca është integruar plotësisht në pjesën urbane”, përderisa theksoi se banorët fshatit do të mbështeten jashtëzakonisht shumë me subvencione në bujqësi.

Kandidati i LDK-së është zotuar se në qendër të qytetit, në Ditën e Flamurit, do të vendoset shtatorja e Mulla Idriz Gjilani.

© KOHA. Të gjitha të drejtat janë të rezervuara.

Komentet

Shto koment

Të ngjashme