LDK-ja kthehet në garën për Vushtrrinë pas një dekade, në balotazh e pret PDK-ja e VV-ja hesht

23 tetor 2017 19:20

10 vjet me radhë PDK-ja e mbajti pushtetin në Vushtrri pa u lëkundur, derisa në këto zgjedhje nuk ia doli t’i fitojë zgjedhjet pa balotazh.

Partinë e Kadri Veselit në këtë komunë po e sfidon LDK-ja, e cila i është ofruar mjaft me rezultate, raporton KTV.

Që tani, Xhafer Tahiri i LDK-së e konsideron fitore rezultatin e tij.

Ai ka nisur menjëherë të negociojë me qytetarë e kundërkandidatë, të cilat e duan ndryshimin në këtë komunë.

Krahasuar me zgjedhjet qendrore, kandidati nga radhët e PDK-së, Ferit Idrizi, thotë se e rriti numrin e votave të PDK-së për 5 mijë më shumë.

Ndërsa është i hapur për koalicion, si me Vetëvendosjen ashtu edhe me partitë tjera.

Nga ana tjetër, Besim Muzaqi, kandidat i Vetëvendosjes që është shumë afër kandidatit të LDK-së, nuk ka dashur ta komentojë rezultatin dhe lidhjen e ndonjë koalicioni me ndonjërin nga kandidatët që shkojnë në balotazh, duke thënë se po presin numërimin e votave me kusht dhe ato nga diaspora.

Sipas rezultateve preliminare të KQZ-së, kandidati i PDK-së ka arritur të fitojë 33,66%, ndërsa ai i LDK-së 25,62 %, që i bie 2.100 vota më pak.

© KOHA. Të gjitha të drejtat janë të rezervuara.

Komentet

Shto koment

Të ngjashme