Shtabi zgjedhor i Qendrës së Lëvizjes Vetëvendosje në Prishtinë mbajti sot konferencë për media për t’i informuar qytetarët lidhur me ecurinë e fushatës.
Drejtuesi i shtabit, njëherësh kryetar i Qendrës së Lëvizjes në Prishtinë, Ylli Hoxha, tha se plani ynë i paraparë për këtë fushatë është realizuar në tërësi. “Organizuam 4 tubime të mëdha në Prishtinë, 46 tubime të mesme nëpër lagje dhe fshatra si dhe qindra tubime të tjera të vogla nëpër shtëpi e lokale, duke kontaktuar kështu drejtpërdrejt me mijëra banorë të Prishtinës. Organizuam mbi 30 aktivitete tematike ku i shtjelluam zotimet tona për mandatin e dytë, të dala nga programi “Prishtina, qytet në çdo lagje”. Zhvilluam fushatë vetëdijesuese për mënyrën e votimit, duke trokitur derë me derë në lagjet dhe fshatrat e Prishtinës”, tha Yll Hoxha.
Ai i siguroi të gjithë votuesit e Prishtinës se vullnetin e tyre të shprehur me votë do ta mbrojmë me çdo çmim. “Organizata jonë, është organizate më e madhe dhe më e fortë në Prishtinë. Kemi angazhuar dhe trajnuar mbi 800 komisionerë dhe vëzhgues; 46 ekipe mobile logjistike; ekipe të raportimit dhe rezultateve; që do ta mbrojnë secilën votë, të secilit qytetar të Prishtinës”, u shpreh Hoxha.
Nënkryetari i VV-së, Dardan Sejdiu, tha se për këto 30 ditë fushatë, në secilën lagje e në secilin fshat, prezantuam programin tonë me 100 zotimet. “100 zotimet tona, të ndara në 10 fusha, janë gjithëpërfshirëse, të matshme e të realizueshme, me ndihmën e asambleistëve që do t’i kemi në Kuvendin Komunal. Nga këto tubime, e kemi parë se mandati jon i ardhshëm do të jetë mandat i plotë, me Shpend Ahmetin kryetar komune, dhe me shumicë të VV-së në kuvend komunal”, tha Sejdiu.
“Por, në Prishtinë në këto 30 ditë pamë edhe një fushatë tjerë: Pa program, me shpifje. Sulmet ishin të njëpasnjëshme, të koordinuara. Ishin pa asnjë bazë e asnjë fakt, ashtu siç ishin gjatë 4 viteve të kaluara në Kuvend Komunal. Si duket, vazhdojnë të punojnë bashkë. Por kjo veç ia qartësuan edhe njëherë qytetarëve të Prishtinës që Vetëvendosje e ka programin, organizatën, kryetarin, ekipin, vullnetin, angazhimin dhe punën që për 4 vitet e ardhshme ta bëjë Prishtinën qytet për të gjithë, qytet në çdo lagje e në çdo fshat. Mungesa e programit qeverisës nga ana atyre, shpifjen e bën të njëjtën mundësi. E programi jonë qeverisës, është alternativa e vetme përballë shpifjeve të tyre të ulëta”, shtoi Sejdiu.
Me punë intensive, nga fundi i vitit 2013, e shpëtuam Prishtinën nga krimi e korrupsioni, dhe kështu i hapëm rrugë zhvillimit. Ua kthyem Komunën qytetarëve dhe e qeverisëm bashkë me ta. Njësoj do të vazhdojmë edhe në mandatin e radhës.
Shtabi Zgjedhor i Qendrës së Lëvizjes Vetëvendosje në Prishtinë ka falënderuar të gjitha aktivistet dhe aktivistët, vullnetaret dhe vullnetarët, që u angazhuan gjatë kësaj fushate për ta përçuar mesazhin e VV-së tek secili qytetar i Prishtinës.
-
20 tetor 2017 17:18
-
Shpërndaje në: