Kandidati për kryetar të Besianës nga VV, Ajet Potera, në tubimin zgjedhor, ka thënë se kjo komunë është katandisur ndër trevat më të pazhvilluara të vendit, përkundër resurseve natyrore e njerëzore që ka, njofton kumtesa partiake, transmeton Koha.net .
“Llapi, që shquhet me një histori të bujshme nëpër kohë të ndryshme, që njihet për bukuritë dhe pasuritë e tij, për njerëzit e tij punëtorë e mikpritës, është katandisur, nga pushtetmbajtësit aktual, në një trevë anemike, ku mbretëron letargjia, ku jeta është rutinizuar brenda orekseve grupore e klanore; me një ekonomi të abuzuar, me arsim të stërkequr, me shëndetësi të degraduar, me kulturë të injoruar, me profesionistë të mënjanuar, me talente të ndrydhura, me administratë të burokratizuar e te pastimuluar, me shërbime publike të diferencuara e jocilësore”, ka thënë Potera, duke potencuar se kjo fotografi e komunës është pasojë e një qeverisjeje të keqe.
“Në dorën tuaj është mundësia që, bashkë, të nisemi rrugës që ky vend e meriton, rrugës, të cilën do e ndërtojmë bashkë për një jetë të ndershme e të dinjitetshme, për një ekonomi të shëndosh e gjithëpërfshirëse, për një arsim cilësor; për një përkujdesje shëndetësore e sociale, çfarë e meritojnë qytetarët; për një kulturë që shpreh vlerat e mirëfillta të vendit tonë dhe njerëzve tanë, për një administrate moderne e të motivuar, për shërbime publike kualitative dhe gjithëpërfshirëse”, tha më tej Ajet Potera.
Potera shtoi po ashtu se heronjtë e kësaj ane nuk do injorohen më, por do qëndrojnë në ballë të vendit, ashtu siç e meritojnë.
“Prandaj, më 22 tetor ejani me mendje të ftohtë e zemër të ngrohtë, ejani ta hapim një kapitull të ri të jetës sonë. Votoni numrin 10 që drejtësia, sinqeriteti, profesionalizmi, suksesi të shumëzohen me dhjetë”, tha Potera, i cili më pas prezantoi edhe kandidatët për Kuvendin Komunal të Besianës.
-
27 shtator 2017 18:33
-
Shpërndaje në: