Veseli: Punësimi i të rinjve, prioriteti ynë për Klinën

Veseli: Punësimi i të rinjve, prioriteti ynë për Klinën

25 shtator 2017 20:31

Partia Demokratike e Kosovës ka mbajtur tubimin elektoral në Klinë për zgjedhjet lokale të 22 tetorit, në të cilin ka marrë pjesë edhe kryetari i partisë, Kadri Veseli.

Me këtë rast i pari i PDK-së Kadri Veseli, tha se prioritet në Klinë do të jetë arsimi, ndërtimi i çerdheve si dhe punësimi i të rinjve. Ai premtoi krijimin e një fondi të punësimit.

“Shtimi i çerdheve është domosdoshmëri edhe në komunën e Klinës. Do të punojmë edhe më shumë që edhe në Klinë të ketë siguri për fëmijët tanë, si sigurimi fizik në të njëjtën kohë që ata të kenë mundësi ti qasen shkollave në mënyrë më të afërt. Prioritet do të jetë rinia, ku do të krijojmë fondin e punësimit i cili do t’u shërbejë të gjithë atyre të rinjve dhe të rejave dhe jo vetëm atyre por të gjithëve që kane ide për vetëpunësim në mënyrë që ata të integrohen në tregun e punës”, tha Veseli, raporton KP.

Ai tha se të gjithë studentët që kanë mesataren mbi 8, do tu jepen bursa nga komunat e tyre. Veseli premtoi edhe dhënie të subvencioneve për të gjithë ata që merren me bujqësi. I pari i PDK-së premtoi edhe reforma në administratën komunale, uljen e taksave komunale, derisa tha se qeverisja e PDK-së nuk do të lejojë burokraci.

Veseli tha se komuna e Klinës ka pasur transformim gjatë qeverisjes së PDK-së për 10 vite, derisa ftoi qytetarët që të mbështesin kandidatin për kryetar Sokol Bashotën.

“Po dal para jush me shumë dinjitet dhe krenari, dhe e konsideroj se është e nevojshme edhe për një mandat të qeverisë një kryetar, një personalitet i cili ka vizion, ka qëndrueshmëri, ke besim në vetvete ka besim tek qytetarët të cilët i udhëheqë”, tha Veseli.

Kandidati i PDK-së për kryetar të Klinës, Sokol Bashota ka lavdëruar punën gjatë qeverisjes së tij me Komunën e Klinës për 3 mandate radhazi, duke thënë se një ndër prioritet e tij ka qenë arsimi. Ai tha se gjatë 10 viteve ka arritur që të sjellë ujin e pijshëm për qytetarët e Klinës, të investojë në kulturë, shëndetësi, investimet në infrastrukturë siç është sheshi i qytetit i cili është duke u ndërtuar.

Bashota tha se PDK-ja u ka kthyer dinjitetin mësimdhënësve dhe punonjësve shëndetësorë.

“Për këto 10 vite të qeverisjes sime janë bërë shumë ndryshime sa i përket investimeve në objektet e këtij vendi. Kemi ndërtuar këtë sallë këtu e cila është e mrekullueshme dhe plotëson të gjitha standardet për aktivitet kulturore, është bërë komuna e re. Palestra e re e cila për interesa të tyre pushteti e pat lënë rrënojë. Poashtu jemi duke ndërtuar qendrën rinore për të rinjtë e Klinës”, tha Bashota.

Ai tha se një tjetër prioritet e tij ka qenë konsolidimi i marrëdhënieve ndërfetare, gjë për të cilën tha se Klina është shembull.

Komentet

Shto koment

Të ngjashme