Zgjedhjet 2019

Kosnetti politikanëve: Si t’ju marrin seriozisht qytetarët kur në listat për deputetë keni të dënuar për korrupsion

Foto: Alban Bujari / Koha

Ambasadori i SHBA-së në Kosovë, Philip Kosnett ka kritikuar partitë politike që kanë vendosur në listat për deputetë, persona me të kaluar kriminale, derisa ata premtojnë se do ta luftojnë korrupsionin.

Ai përmes një postimi në Twitter, ka shkruar se qytetarët nuk mund t’i marrin seriozisht këto parti.

“Si mund ta marrin seriozisht qytetarët përkushtimin e shprehur të partive politike për sundim të ligjit në Kosovë, kur në listat e shumë partive ka individë me aktakuza në fuqi, me dënime për shkelje, si: krimet e luftës dhe sulme, si dhe me sanksione ndërkombëtare për krime të luftës dhe korrupsion”, ka shkruar Kosnett në Twitter.

Përkundër zotimeve të disa partive politike se nuk do të garojnë me individë që kanë probleme me ligjin, në listat e tyre zgjedhore janë para disa persona, të cilët kanë aktakuza të ngritura në gjykatat e Kosovës.

Grupi Koha tashmë ka publikuar emrat e disa kandidatëve për deputetë nga parti të ndryshme, të cilët janë ose të dënuar, ose të akuzuar për vepra të ndryshme penale.

Ai tutje ka thënë se “a ka gjasa që Kuvendi të miratojë një ligj për përgjegjësinë e shtetit”.

“Gjykata Themelore e Prizrenit ndërmori një hap të madh përpara për zbatimin e shtetit të së drejtës në Kosovë duke e bërë përgjegjës shtetin për mos mbrojtjen e një qytetari nga dhuna në familje. A mundet Kuvendi të shkojë më tej dhe të miratojë një ligj për përgjegjësinë e shtetit?”, ka shkruar Kosnett.

Lexo më poshtë

Garës për deputetë nga PDK-ja, do t’i hyjnë kandidatë të dënuar e të akuzuar

LDK-ja zëvendëson Haki Raqin e dënuar me Qibrije Hoxhën

Kadrijaj mbron të akuzuarit që po garojnë për deputetë me AAK-në

AAK-ja nominon për deputetë persona me aktakuza, PDK, VV e LDK thonë se nuk do të veprojnë kështu