Si rrallëherë. në mbledhjen e Këshillit të Përgjithshëm të Vetëvendosjes, delegatëve nga kjo foltore u është drejtuar nënkryetarja e partisë, Fatmire Kollçaku, në mungesë të kryetarit Visar Ymeri.
Ymeri ka zgjedhur një formë tjetër për t’iu drejtuar aktivistëve të këtij subjekti.
Përmes një letre ka thënë se mbajtja e kësaj mbledhjeje në këtë situatë të tendosur dhe me delegatë jo të informuar mirë, sipas tij, nuk është mundësi e mirë për zgjidhjen e problemeve brenda partisë.
Në këtë mbledhje që është thirrur pas përplasjeve të fundit në këtë parti nuk ishin të pranishëm as Dardan Molliqaj e Aida Dërguti.
Por ka qenë nënkryetarja Kollçaku që ka kërkuar bashkim siç ka thënë ajo jo rreth një personi, por vlerave demokratike të VV-së.
Mbledhja ka vazhduar pa praninë e mediave, ku pas përfundimit është bërë e ditur se është vendosur për mbajtjen e zgjedhjeve për kryetar të partisë.
Kryesuesi i Këshillit të Përgjithshëm, Hydajet Hyseni dhe Ushtruesi i detyrës së sekretarit të VV-së, Ismajl Kurteshi thanë se mbledhja është karakterizuar me frymë demokratike.
Kanë deklaruar se subjekti i tyre është më unik se kurrë.
Në anën tjetër në mbledhje është diskutuar edhe për koalicionet e Vetëvendosjes në komunat që kanë fituar .
Këtu televizioni merr vesh se ka pasur mospajtime rreth koalicionit të Shpend Ahmetit me AAK-në.
Ka qenë ish-drejtoresha e Arsimit në Komunën e Prishtinës, tash deputete në Kuvendin e Kosovës, Arbërie Nagavci e cila nuk është pajtuar kjo drejtori të udhëhiqet nga AAK-ja.
Kundërshtime ka pasur edhe për drejtorinë e Inspeksionit, ku pritet që edhe me këtë drejtori të udhëheqë AAK-ja.
Sipas Hysen Durmishit, nëse ndodh kjo ndërtimet pa leje do të vazhdojnë si në kohën kur kryeqyteti nuk qeverisej nga Vetëvendosje.
Mospajtime ka pasur edhe për koalicionin me AKR-në, por me gjithë kundërshtimet, Këshilli ka aprovuar këto marrëveshje në Prishtinë, ashtu siç ka vepruar edhe për marrëveshjet në Prizren.
-
17 dhjetor 2017 19:11
-
Shpërndaje në: