Përkundër deklarimeve se takimet mes kryetarëve të Lëvizjes Vetëvendosje dhe të Lidhjes Demokratike të Kosovës do të intensifikohen, një i tillë nuk është mbajtur këtë të enjte.
Kryetari i Vetëvendosjes, Albin Kurti, ka thënë se nga takimi i mbajtur të mërkurën me LDK-në, nuk ka ndonjë rezultat.
Sipas Kurtit, me thirrjen e seancës për konstituimin e kuvendit më 24 dhjetor, Presidenti Hashim Thaçi u ka dhënë kohë më shumë sesa kanë nevojë për arritjen e koalicionit.
Përkundër optimizmit se marrëveshja me Vetëvendosjen do të arrihet, Lidhja Demokratike e Kosovës nuk do të heqë dorë nga posti i presidentit.
Haxhi Avdyli i LDK-së thotë se nëse diskutimi për pozitën e presidentit bëhet pas formimit të qeverisë, koalicioni mes dy partive mund të hasë në probleme një vit më pas.
Kryetari i Vetëvendosjes, Albin Kurti, dhe ai i LDK-së, Isa Mustafa, janë takuar të mërkurën pasdite. Nga ky takim, i cili zgjati rreth një orë, e për të cilin nuk u deklaruan asnjëri nga liderët, është bërë e ditur se janë marrë vesh që të takohen më shpesh për arritjen e një marrëveshjeje bashkëqeverisëse.
Në anën tjetër, seanca ku pritet të betohen deputetët e rinj dhe të zgjidhen udhëheqësit e Kuvendit, do të mbahet më 24 dhjetor në orën 09:00.
-
12 dhjetor 2019 19:11
-
Shpërndaje në: