Në prag të afrimit të ditës ndërkombëtare të personave të zhdukur, familjarë dhe anëtarë të komisionit qeveritar, mbajtën mbledhjen e radhës.
Përkundër miratimit të pikave të rendit të ditës dhe diskutimit të tyre, shqetësime të tjera përcolli anëtarja e këtij komisioni, Nysrete Kumnova.
Ajo kërkoi sqarime nga këshilltari i Kryeministrit për persona të zhdukur, Jahja Lluka, rreth ligjit të pensioneve për familjarët e të pagjeturve, raporton KTV.
Për shqetësimin e Kumnovës, Lluka tregoi se koncept dokumenti për rritjen e pensioneve është miratuar nga Qeveria, derisa janë duke pritur vendimin e Gjykatës Kushtetuese.
Debati mes Kumnovës e Llukës vazhdoi edhe më tutje, ku u diskutua për 300 mbetjet mortore që gjenden në Prishtinë, për të cilat është thënë se do të varrosen.
Kumnova i bëri kërkesë anëtarëve të komisionit që këto mbetje të mos varrosen pa u identifikuar tërësisht.
Lluka foli edhe për lirimin e parakohshëm të kriminelit serb, Miodrag Shollaja, duke e quajtur të papranueshëm e në kundërshtim me zotimet e Serbisë.
Komisioni diskutoi edhe për organizimin e 30 gushtit, Ditës Ndërkombëtare të Personave të Zhdukur dhe caktoi edhe këshillin organizativ për këtë.
-
16 gusht 2019 21:22
-
Shpërndaje në: