Miliarderi Elon Musk është paditur nga investitorët e Twitterit, të cilët pretendojnë se njeriu më i pasur në botë, manipuloi çmimin e aksioneve të kompanisë.

Padia ka ardhur pasi shefi ekzekutiv i prodhuesit të makinave elektrike, Tesla ka bërë një ofertë prej 44 miliardë dollarësh për blerjen e platformës së mediave sociale, shkruan Reuters të enjten.

Investitorët thanë se Musku i kurseu vetes 156 milionë dollarë duke mos zbuluar se kishte blerë më shumë se 5% të Twitterit deri më 14 mars.

Ata gjithashtu e shpallën Twitterin si të pandehur, duke argumentuar se kompania kishte detyrim të hetonte sjelljen e Muskut, megjithëse nuk po kërkojnë dëmshpërblim nga firma.

Investitorët thanë se Musku vazhdoi të blinte aksione pas kësaj dhe përfundimisht zbuloi në fillim të prillit se ai zotëronte 9.2% të kompanisë, sipas padisë, të paraqitur të mërkurën në gjykatën federale të San Franciscos.

"Duke mos i bërë të ditura aksionet e tij në Twitter, Musk u angazhua në manipulimin e tregut dhe bleu aksionet e Twitterit me një çmim artificialisht të ulët", thanë investitorët, të udhëhequr nga William Heresniak.

Investitorët thanë se rënia e fundit e aksioneve të Teslas e ka vënë në pikëpyetje aftësinë e Muskut për të financuar blerjen e Twitterit, pasi ai ka lënë peng aksionet e tij si kolateral për të siguruar kreditë që i nevojiten për të blerë kompaninë.

Aksionet e Teslas u tregtuan me rreth 713 dollarë të enjten pasdite, nga mbi 1.000 dollarë sa u tregtuan në fillim të prillit.

Koha e zbulimit të aksioneve nga Musku ka shkaktuar tashmë një hetim nga Komisioni i Letrave me Vlerë dhe Shkëmbimeve të SHBA-së (SEC), raportoi Wall Street Journal në fillim të këtij muaji.

SEC kërkon që çdo investitor që blen aksione që tejkalojë 5% në një kompani, të zbulojë zotërimet e tij brenda 10 ditëve.