Festivalin Olimpik PyeongChang 2018 tashmë ka hyrë në fazën finale dhe më joshëse.
Ky festival që po mbahet për herë të parë në Kosovë, e që përkon më Lojërat Olimpike Dimërore që po mbahen në Korenë e Jugut, për disa ditë rresht ka mbledh qytetarë të shumtë, sidomos fëmijë.
Pas sporteve të patinazhit dhe kërlingut, në ditën e 16-të, është promovuar edhe sporti i hokejit. Dhjetëra fëmijë ishin pjesë te këtij sporti që nga sot është jetësuar edhe në kryeqytet.
Reihane Haliti, përgjegjëse për organizimin e Festivalin Olimpik PyeongChang 2018, i tha KP-së se sot zyrtarisht u promovua hokeji në Kosovë. Sipas saj, gjatë tërë këtyre ditëve është bërë përzgjedhja e fëmijëve për këtë sport, e që sipas Halitit, fëmijët janë jashtëzakonisht të kënaqur që kanë pasur rastin të provojnë veten në hokej.
“Sot filloi hokeji zyrtarisht me u promovua në Festivalin Olimpik të organizuar nga Komiteti Olimpik i Kosovës, në të njëjtën kohë kur po mbahen edhe Lojërat Olimpike Dimërore, ku përfaqësuesi i Kosovës është Albin Tahiri, i cili korri suksese optimale. Fëmijët janë përzgjedhur gjatë tërë kohës në patinazh, ku është promovimi i patinazhit, kërlingut, sot hokeji veç po vazhdon. Ju mund të shihni që fëmijët janë shumë të kënaqur me hokej. Janë tri grupe të formuara, trajneri i tyre i ka ushtruar gjatë tërës kohës, dhe mendojmë sa për fillim hokeji që është për herë të parë në Kosovë, ka pasur fillim të mbarë”, tha Haliti.
Ajo ka shtuar se pjesëmarrja e fëmijëve ka qenë shumë e madhe, dhe sipas saj, fëmijët janë vërtetë të kënaqur me Festivalin Olimpik PyeongChang 2018. Madje, Haliti thotë se për organizimin e këtij festivali kanë marrë përgëzime nga shumë shkolla dhe prindërit e fëmijëve.
Ndërkaq, Fatos Rexhepaj, trajner i hokejit e vlerësoi tejet të rëndësishëm jetësimin e hokejit në Kosovë. Sipas tij, pjesëmarrja e fëmijëve ka qenë mjaft e madhe në promovimin e hokejit, por sipas tij, edhe në ditët e kaluar të Festivalit Olimpik PyeongChang 2018.
“E vlerësoj shumë pjesëmarrjen e fëmijëve, ka mjaftueshëm fëmijë. Këtu bëjnë pjesë disa fëmijë të cilët kanë qenë më aktivë gjatë ditëve të patinazhit. Momentalisht janë t’u zhvilluar lojën e hokejit. Loja hokej mbi akull kjo është loja e parë pasi me promovimin e patinazhit dhe mundësia e madhe e fëmijë këtu na dha një mundësi që të zhvillojmë një lojë të hokejit. Kjo është loja e parë e hokejit që po zhvillohet në Kosovë”, theksoi Rexhepaj.
Festivalin Olimpik PyeongChang 2018 do të vazhdojë edhe nesër, e ku sipas pjesëmarrësve, pritet të ketë fëmijë të shumtë për të shijuar sportet e këtij festivali olimpik.
-
24 shkurt 2018 17:25
-
Shpërndaje në: