Refuzohet ftesa për sportistët rusë për Lojërat Dimërore

Refuzohet ftesa për sportistët rusë për Lojërat Dimërore

05 shkurt 2018 17:42

Komiteti Olimpik Ndërkombëtar (IOC) i është kundërpërgjigjur Gjykatës së Arbitrazhit Sportiv për sa i përket 28 sportistëve rusë, të cilëve iu hoq dënimi me pezullim të përjetshëm.

Për 13 nga këta sportistë dhe dy trajnerë u kërkua që t’u bëhej ftesë për pjesëmarrjen në Lojërat Olimpike Dimërore, kërkesë që nuk u pranua nga IOC-ja.

Një komision special i këtij organizmi vendosi në mënyrë unanime që të ndalojë garimin e këtyre sportistëve në ngjarjen më të rëndësishme sportive dimërore, që nis pas pak ditësh në Pyeongchang të Koresë Jugore.

“Konfirmojmë se nuk do të ketë ftesa të tjera për këta 15 sportistë, që ishin pjesë e grupit të atyre që ishin pezulluar përjetë nga aktivitetet, por që CAS-i i Lozanës ua anuloi dënimin”, thekson IOC-ja, paneli i së cilës, i kryesuar nga ish-ministrja franceze e Sporteve, Valeri Fourneyro, kishte shqyrtuar të gjitha rastet një për një, transmeton KP.

Komiteti Olimpik Ndërkombëtar ia ndaloi Rusisë pjesëmarrjen në Lojërat Olimpike për shkak të skandalit të dopingut që ka tronditur botën e sportit. Përjashtim bëjnë 169 sportistë që rezultuan të pastër pas një sërë testesh të forta antidoping, duke u lejuar të marrin pjesë në këtë ngjarje sportive nën flamurin olimpik.

“Më ka shqetësuar vendimi i CAS-it, që duhet rishikuar, e të cilin ne do ta apelojmë”, u shpreh presidenti i IOC-së, Thomas Bach, qëndrim të cilin më pas e shfaqi edhe Agjencia Botërore Antidoping.

Komentet

Shto koment

Të ngjashme