Boksieri shqiptar Musa Avdimetaj, që në ringun profesionist njihet si James Kraft, është mposhtur të shtunën mbrëma me vendim unanim pas dhjetë raundeve, nga ish-kampioni i botës, Felix Sturm.
Për Avdimetajn 24-vjeçar ishte meçi më i madh i karrierës dhe mundësia për të arritur te një luftë për ndonjë titull të madh.
Por, ai nuk arriti të befasonte Sturmin 42-vjeçar.
“Ishte punë e vështirë për Felixin”, ka thënë trajneri i Felix Sturmit, Ulli Wegner, raporton Bild.
Edhe ish-boksieri i famshëm gjerman Axel Schulz tha se mbeti i befasuar nga Avdimetaj.
“Kraft më befasoi totalisht”, tha Schulz.
Për Avdimetajn është humbja e parë në karrierë karshi 19 fitoreve e një barazimi. Sturm ka shënuar fitoren e 42-të, ndërsa i ka edhe pesë humbje e tri barazime. Në parameç në mbrëmjen në Hamburg të organizuar nga Universumi, boksoi edhe Senad Gashi. Boksieri shqiptar i peshës së rëndë u mposht me vendim unanim nga Hussein Muhamed në luftën për titullin WBC International Silver. Për Gashin ishte humbja e katërt karshi 21 fitoreve.
-
20 qershor 2021 08:54
-
Shpërndaje në: