Te Tottenhami janë të vendosur ta kthejnë sulmuesin uellsian Gareth Bale nga Real Madridi dhe mediumet spanjolle kanë njoftuar të premten se ekipi anglez tashmë ka bërë ofertë për shërbimet e tij.

“Marca” ka raportuar se Tottenhami ka ofruar kartonin e Christian Eriksenit plus 30 milionë euro dëmshpërblim për transferimin e Balet gjatë afatit kalimtar të janarit, transmeton Koha Ditore.

Trajneri i ri i Tottenhamit, Jose Mourinho, po insiston në kthimin e uellsianit, të cilin e sheh si përforcim të madh për ekipin. Bale edhe këtë edicion po ka minutazhë të kufizuar te Real Madridi, me të cilin ekip ka kontratë deri në vitin 2022.

30-vjeçari këtë edicion ka shënuar dy gola e ka dhënë po aq asistime në 13 ndeshje për Realin. Ai te Reali qe transferuar në vitin 2013 nga Tottenhami për 101 milionë euro dëmshpërblim.