F1, Hamilton triumfon në Çmimin e Madh të Kinës Foto: Reuters

F1, Hamilton triumfon në Çmimin e Madh të Kinës

09 prill 2017 09:59

Pas triumfit të Ferrarit në garën e parë sezonale të Melbournit në Australi, ka ardhur edhe kundërpërgjigjja e Mercedesit me nënkampionin e vitit të kaluar, Lewis Hamilton në çmimin e madh të Kinës. Britaniku e nisi garën nga vendi i parë dhe e përfundoi atë sërish aty, pa u shqetësuar aspak nga rivalët e tij.

Gjermani i Ferrarit, Vettel arrin gjithsesi të renditet në vendin e dytë, duke mbetur me pikë të barabarta tashmë me britanikun në klasifikimin e pilotëve, e duke u shfaqur kështu si kundërshtari kryesor për fitimin e këtij Botërori të Formulës 1, shkruan tch.

Një sfidë spektakolare në xhirot e fundit ishte ajo mes dy pilotëve të Red Bullit për vendin e fundit në podium, mes Verstappenit dhe Ricciardos, me australianin që ishte shumë pranë parakalimit por në kthesën e fundit frenon deri në bllokim të gomave, duke mbetur pas holandezit.

Gara e ardhshme e Botërorit të Formulës 1 është pas një jave në Bahrein.

Komentet

Shto koment

Të ngjashme