Showbiz

Kanye West e anulon pjesëmarrjen në “Coachella”

Foto: AP/Associated Press

Reperi i famshëm amerikan, Kanye West, është tërhequr nga performanca në festivalin e njohur të muzikës, Coachella”, ku ishte njëri ndër performuesit kryesorë, raportoi të martën portali “Female”.

Ye, kishte muaj të tërë që i kishte paralajmëruar fansat se do të jetë pjesë e festivalit i cili zë vend në shkretëtirën e Kalifornisë, e ku pritet të performojnë edhe yje tjerë të muzikës, si Billie Eilish, Harry Styles, Doja Cat, “Swedish House Mafia” dhe të tjerë.

Festivali do të mbahet nga 15 deri më 24 prill.

Sipas uebfaqes “Page Six”, reperi 44-vjeçar nga Chicago, do të zëvendësohet në këtë ngjarje nga këngëtari kanadez, The Weeknd.

“Kanye është tërhequr zyrtarisht nga pjesëmarrja në ‘Coachella’. Ai nuk ka bërë fare prova dhe nuk është përgatitur për një shou të stilit të tij. Travis Scott pritej ta shoqëronte atë në skenë. Kurse tani, praktikisht është e pamundur për të që ta organizojë një performancë të mirë. Besohet se The Weeknd do ta zëvendësojë atë në festival”, deklaroi një burim.

Mediat e huaja gjithashtu raportojnë se, reperi i cili në nëntor të vitit të kaluar e ndërroi emrin në Ye, është tërhequr nga pjesëmarrja në festival, pasi dëshiron të largohet për ca kohë nga vëmendja e publikut. Kjo, pasi u bë pjesë e disa skandaleve që përfshinin ish-gruan e tij, Kim Kardashian dhe të dashurin e saj 28-vjeçar, Pete Davidson. Besohet se tani, West dëshiron ta largojë veten nga dramat e shkaktuara nga vet ai, të kujdeset për shëndetin e tij mendor dhe të kërkojë ndihmë profesionale.

Kim dhe Kanye, dikur një prej çifteve më të përfolura të showbizit, i kanë 4 fëmijë së bashku, North, Saint, Chicago dhe Psalm.

Ngacmimet e njëpasnjëshme drejtuar yllit të “Saturday Night Live”, Pete Davidson dhe më pas shokut të tij komedian, Trevor Noah, bënë që Ye të pezullohej nga Instagrami për 24 orë. Ai vazhdon të mos postojë më në këtë rrjet social.