Ka banka, tabela e shumë orendi tjera për të treguar se në këtë shtëpi në lagjen “Kodra e Trimave” është mbajtur mësim.
Objekti, i cili ndryshe njihet si shkolla e Herticve, u shkatërrua nga lufta e fundit në Kosovë, raporton “038” në KTV.
Pronarët tregojnë se intervenuan për ta mbrojtur objektin nga shkatërrimi i tërësishëm.
Sipas tyre, objekti ka rëndësi historike dhe si i tillë duhet të ruhet si trashëgimi për gjeneratat e ardhshme.
Madje, shtëpia shkollë është ndër objektet e pakta që tregon se në Prishtinë ka pasur luftë.
Por, ata janë të zhgënjyer se si Komuna e as Ministria e Kulturës pavarësisht premtimeve ende nuk kanë filluar restaurimin e saj.
Ata e kanë ofruar shtëpinë pa kërkuar asnjë kompensim.
Nga Ministria e Kulturës kanë thënë se objekti është në mbrojtje si aset i trashëgimisë kulturore.
Edona Durguti nga kjo Ministri ka thënë se është duke u përgatitur projekti për ndërhyrjen në këtë objekt.
Ministria ka ndarë buxhet rreth 30 mijë euro për restaurimin e tij.
Ndërkohë, KTV-ja ka provuar të marrë një qëndrim edhe nga Komuna e Prishtinës, por zyrtarë të saj nuk kanë dhënë ndonjë përgjigje.
-
22 prill 2018 10:22
-
Shpërndaje në: