Nëpër një gjendje të rëndë u duhet të kalojnë rrugën banorëve të Hajvalisë në Prishtinë.
Shtyllat e vjetruara elektrike në rrugën “Dëshmorët e Gollakut” të kësaj lagjeje, po rrezikojnë jetën e banorëve të këtushëm, raporton KTV.
Derisa shumë prej këtyre shtyllave duhet të mbahen nga njëra-tjetra ose nga vetë kabllot e instaluara në to.
Banorë të tjerë fajin ua hedhin kamionëve të kompanive ndërtuese, ndërsa shtojnë se nga kjo gjendje po rrezikohet jeta e fëmijëve dhe e kalimtarëve të tjerë.
Për banorët, gjendja ka mbetur e njëjta tash e sa kohë, ndërsa pavarësisht vendosjes së shtyllave të betonit, shumë nga to nuk janë funksionale.
E për shqetësimet e tyre, banorët thonë se KEDS-i asnjëherë nuk i mori parasysh pavarësisht ankesave të bëra.
Shumë nga shtyllat aktuale në këtë lagje, banorët është dashur që t’i rregullojnë personalisht.
Për shqetësimin dhe ankesat e banorëve të lagjes Hajvalia, zyrtarë nga KEDS-i i kanë thënë KTV-së se ekipet e kësaj kompanie do të shmangin çdo rrezik të mundshëm.
“KEDS-i e ka pranuar ankesën e paraqitur përmes jush dhe i ka dërguar ekipet që të verifikojnë gjendjen. Ekipet e KEDS-it menjëherë do ta evitojnë çdo rrezik eventual që mund të jetë paraqitur në atë pjesë”, ka thënë Viktor Buzhala, zëdhënës në KEDS.
Tutje, në përgjigjen e KEDS-it thuhet pas ekzaminimit të gjendjes nga ekipi i këtij institucioni, do të merren edhe masa për rregullimin e problemit.
-
29 tetor 2019 22:23
-
Shpërndaje në: