Arbëri

Çiklistët e Prishtinës kërkojnë shtigje për ta

Më pak vetura e më shumë këmbësorë e çiklistë. Këtë e propozon Plani i Mobilitetit, i cili kërkon nga Komuna e Prishtinës që të promovojë sa më shumë përdorimin e çikletave.

Por, të udhëtosh me biçikletë në kryeqytet, nuk është e lehtë, raporton emisioni 038 i KTV-së.

Rrugët e Prishtinës kanë marrë edhe jetë çiklistësh nga aksidentet që kanë ndodhur.

Për këtë, në këtë plan rekomandohet që në vendet ku është e mundur, të krijohen shtigje për çiklistë.

Granit Kadolli, nga Xtrime Bike Prishtina, thotë se Komuna e Prishtinës ka prioritet veturat dhe jo politikat e gjelbra.

Komuna e Prishtinës ka ngushtuar trotuaret në Ulpianë, për të ndërtuar parkingje.

Të vonshëm e ka quajtur publikimin e Planit të Moblitetit, deputetja e Kuvendit të Kosovës nga Vetëvendosje, Fitore Pacolli.

Pacolli, e cila udhëton me biçikletë që nga koha kur ishte shefe e kabinetit të kryetarit Ahmeti, thotë se edhe shtigjet ekzistuese në “Rrugën B”, nuk mirëmbahen nga Komuna e Prishtinës.

Për shkak të lagjeve që ndodhen në zona të larta, Plani i Mobilitetit rekomandon vendosjen e hapësirave për parking nëpër autobusë të trafikut urban, në mënyrë që kthimin ta bëjnë me autobus.