Lifestyle

Kërpudhat janë më të shëndetshme kur fërgohen ose mikrovalohen

Gatimi shpesh mund t’i zvogëlojë cilësitë ushqimore të perimeve. Por disa metoda e ruajnë përmbajtjen e shëndetshme të ushqimit, transmeton koha.net.

Hulumtimet e reja nga Spanja sugjerojnë se mikrovalëzimi dhe fërgimi janë metodat më të mira për ruajtjen e përbërësve ushqyes të kërpudhave.

Kërpudhat konsiderohen si një formë e shëndetshme e fibrave dietike dhe proteinave. Ato e përmbajnë një sërë vitaminash, përfshirë B1, B2, B12, C, D dhe E, si dhe minerale si: zinku dhe seleniumi. Kërpudhat gjithashtu përmbajnë antioksidantë dhe agjentë të tjerë bioaktivë si betaglukanet, të cilat besohet se e ndihmojnë rregullimin e sistemit imunitar.

Shkencëtarët i zien, mikrovalizuan, fërguan dhe i tiganisën katër lloje të zakonshme të kërpudhave - kërpudhat e bardha, shiitake, kërpudhat oyster dhe kërpudhat mbretërore oyster. Studiuesit i thanë dhe ngrinë si kërpudhat e papërpunuara ashtu edhe ato të gatuara për analiza në laborator.

Hulumtuesit i publikuan gjetjet e tyre në International Journal of Food Sciences and Nutrition.

Tiganisja e rriti yndyrën dhe kaloritë e kërpudhave, por e zvogëloi përmbajtjen ushqyese të kërpudhave. Zierja e nxiti aktivitetin e betaglukanit në mostrat e kërpudhave, por e reduktoi aktivitetin antioksidues.

"Trajtimet me tiganisje dhe zierje prodhuan humbje më të mëdha në proteina dhe në komponimet antioksidante, ndoshta për shkak të kullimit të substancave të tretshme në ujë ose në vaj, gjë që mund të ndikojë ndjeshëm në vlerën ushqyese të produktit përfundimtar", tha studiuesja Irene Roncero në një njoftim për shtyp.

Kërpudhat e mikrovalëzuara dhe të fërguara treguan nivele më të larta antioksidantësh.

"Kur kërpudhat u gatuan në mikrovalë ose skarë, përmbajtja e aktivitetit të polifenolit dhe antioksiduesve u rrit ndjeshëm, dhe nuk ka humbje të konsiderueshme në vlerën ushqyese të kërpudhave të gatuara", tha Roncero.

Studiuesit thonë se shtimi i një shtrese të vogël të vajit në kërpudha para ose gjatë fërgimit nuk do t’i reduktojë përfitimet shëndetësore të ofruara nga metoda e gatimit.

"Në fakt, kapaciteti antioksidues mund të përmirësohet edhe më shumë", tha Roncero. "Për më tepër, nëse përdoret vaji i ullirit, profili i acidit yndyror të përgatitjes përfundimtare rritet me rritjen e vogël të përmbajtjes së kalorive".

Legjenda: Kërpudhat më të shëndetshme janë kërpudhat e fërguara apo të mikrovalëzuara, sugjeron hulumtimi i ri. (Foto nga SINC)