Në një veprim simbolik për të tërhequr vëmendjen ndaj ndryshimeve klimatike, Islanda do të zbulojë këtë të diel një pllakë në kujtim të Okjokull, akullnajës së parë të ishullit, e cila ka humbur statusin e akullnajave si pasojë e shkrirjes nga rritja e temperaturave.

Pllaka përkujtimore do të zbulohet rreth orës 17:00 në vendin ku ishte Okjokull, (akullnajë në rregull), në pjesën perëndimore të ishullit.

Kryeministri i Islandës Catherine Jacobsdottir dhe ish-komisionerja e lartë e Kombeve të Bashkuara për të Drejtat e Njeriut, Mary Robinson, do të marrin pjesë në ceremoni.

Me këtë pllakë, e cila mban mbishkrimin "Një letër për të ardhmen", studiuesit shpresojnë të ngrenë vetëdijen e popullatës për zhdukjen e akullnajave dhe pasojat e ndryshimit të klimës.

Pllaka mban gjithashtu mbishkrimin '415 ppm CO2', një referencë për nivelin rekord të dioksidit të karbonit të regjistruar majin e kaluar në atmosferë.

Me këtë ceremoni "ne duam të nxjerrim në pah ato që po zhduken - ose po vdesin" në të gjithë botën dhe të tërheqim vëmendjen për faktin se kjo është diçka që është bërë "nga njerëzit", edhe pse nuk duhet të jemi krenar për këtë, "tha Ximen Haou në një deklaratë.

"Diskutimet mbi ndryshimin e klimës mund të jenë shumë abstrakte, të shoqëruara nga statistika të shumta katastrofike dhe modele shkencore komplekse, të pakuptueshme", shton ai.

Sipas studiuesit dhe kolegut Dominique Bouillet, Islanda humbet rreth njëmbëdhjetë miliardë ton akull çdo vit. Shkencëtarët kanë frikë se në rreth 200 vjet, rreth 400 akullnajat në ishull do të jenë zhdukur.

Akullnaja Okjokull, e cila ende mbulonte një sipërfaqe prej 16 kilometrash katrorë në vitin 1890, në vitin 2012 kishte një sipërfaqe prej vetëm 700 metrash katrorë, sipas një raporti të Universitetit të Islandës i botuar në 2017.

Në vitin 2014, "ne morëm vendimin se nuk ishte më akullnajë, ishte thjesht akull i ngordhur që nuk lëvizte më", thotë gjeologu Ondur Sigurdson, i cili studionte Okjokull. Nga ai moment Okjokull, nuk u konsiderua më një akullnajë.

Për të pasur statusin e akullnajës, masa e akullit dhe dëborës "duhet të jetë mjaft e dendur për të qenë në gjendje të lëvizë për shkak të peshës së vet", domethënë 40 deri 50 metra e trashë sa të prodhojë presion të mjaftueshëm për të ruajtur disa plasticitet.