Përveç ngjarjeve kulturore e artistike, këtë fundvit, kryeqytetit i janë shtuar edhe tingujt e muzikës barok.

Interpretimet e korit dhe Orkestrës së Filarmonisë së Kosovës i bëjnë këto ngjarje edhe më të veçanta, bën të ditur emisioni “Express” i KTV-së.

Interpretimit të tyre të fundit, këtë herë iu shtuan edhe zërat e mrekullueshëm të këngëtarëve operistikë nga Franca. Kombinimi i zërave të dy sopranove franceze me Filarmoninë e Kosovës, rezultoi në një performancë që mbushi hapësirën e kishës katolike “Shën Ndou” me të pranishëm.

Ky koncert po ashtu e shënoi 39-vjetorin e shpërblimit të Nënë Terezës me çmimin Nobel.

Pas dy muajsh prova e një organizimi të mrekullueshëm, dashamirët e muzikës patën rastin të merrnin pjesë në këtë koncert, me program të interpretuar për herë të parë, plotësisht më muzikë barokene.

Ajo çfarë e bëri këtë performancë edhe më të veçantë, ishin dy këngëtaret operistike nga Franca, Clemence Garcia dhe Caroline Champy - Tursun. Për herë të parë, ato sollën në Kosovë një ndër veprat më të mëdha të Stabat Mater.

“Ne kemi performuar vepra të Stabat Materit edhe më parë, po asnjëherë së bashku me kor. Ishte me të vërtetë eksperiencë e veçantë dhe bashkëpunimi me korin dhe Orkestrën ishte shumë i lehtë. Edhe pse ishte hera e parë që kënduam me kor, shkoi shumë mirë. Më parë kemi performuar vetëm solo, ishte diçka e re edhe për ne. Ne nisnim fjalinë në tekst e kori e vazhdonte. Me të vërtetë ishte një performancë e fuqishme”, janë shprehur dy këngëtaret operistike.

Filarmonia e Kosovës këtë fundvit, ka sjellë performanca të mrekullueshme, duke bërë që edhe publiku kosovar të njoftohet me muzikën barok.

Më 23 dhjetor, Filarmonia e Kosovës do ta sjellë edhe koncertin e Vitit të Ri, këtë herë nën dirigjimin e një dirigjenti nga Gjermania.