Policët e hashashit në arrati, Prokuroria e bindur për dekonspirim

Policët e hashashit në arrati, Prokuroria e bindur për dekonspirim

24 nëntor 2017 15:54

Prokuroria e Krimeve të Rënda nuk ka asnjë dyshim që operacioni për ndalimin e tre ish-drejtuesve të Policisë së Vlorës, të dyshuar si të implikuar në trafikun e narkotikëve me organizatën e Habilajve është dekonspiruar, raporton Shqip.

Këtë bindje ata e mbështesin me faktin se në momentin kur janë marrë vendimet e Gjykatës së Krimeve të Rënda, në datë 21 nëntor, për ndalimin e tyre, Prokuroria kishte informacion të sigurt që ish-drejtori i Policisë së Vlorës, Jaeld Çela, ish-shefi i Seksionit Kundër Krimit të Organizuar Gjergj Kohila dhe ish-shefi i Postës Policore të Radhimes, Sokol Bode ndodheshin në Tiranë.

Madje, burime nga institucioni i akuzës thonë se diheshin edhe zonat ku ata qëndronin, ndërsa nga ora 10;30 e paradites së të mërkurës e në vazhdim, asnjë prej tyre nuk u gjet në zonat ku ishin parë një ditë para se të lëshoheshin urdhër-arrestet.

Në lidhje me këtë rast ka nisur hetimet edhe Shërbimi i Çështjeve të Brendshme dhe Ankesave në Ministrinë e Brendshme.

Ndërkohë, Drejtoria e Standardeve Profesionale ka nisur procedurat për përjashtimin e tre efektivëve të kërkuar nga radhët e policisë, duke i hapur rrugë shpalljes së tyre në kërkim ndërkombëtar.

Pritet që Ministria e Brendshme të depozitojë edhe një kallëzim penal në Prokurorinë e Krimeve të Rënda për dekonspirimin e operacionit për arrestimin e tre ish-drejtuesve të policisë lokale të Vlorës.

Ata akuzohen se kanë bashkëpunuar me grupin e Habilajve në kultivimin dhe trafikimin e hashashit drejt Italisë.

24 nëntor 2017 (gazeta-Shqip.com)/Top Channel

Komentet

Shto koment

Të ngjashme