Kronikë

Shkatërrohet grupi i prostitucionit në Tiranë, 10 të arrestuar

Efektivët e policisë Tiranë, në bashkëpunim me Prokurorinë natën mes të mërkurës dhe të enjtes, kanë finalizuar operacionin e koduar “Taksi e lirë 2”, gjatë të cilit janë arrestuar dhjetë persona si dhe janë proceduar të tjerë, të cilët ushtronin veprimtari të paligjshme, si një rrjet për “shfrytëzim prostitucioni”.

Drejtori i Policisë së Tiranës, Ardi Veliu në një konferencë për mediat ditën e sotme tha se të arrestuarit janë Ruzhdi Gapi, 41 vjeç, lindur dhe banues në Tiranë, i pa dënuar, i arrestuar për kryerjen e veprës penale “Shfrytëzim i prostitucionit”.

-Edmond Shkalla, 49 vjeç, lindur dhe banues në Tiranë, i pa dënuar më parë. Arrestuar për kryerjen e veprës penale “Shfrytëzim i prostitucionit”,

-Albina Kasa, 26 vjeç, lindur në Elbasan dhe banuese në Tiranë, e pa dënuar më parë. Arrestuar për kryerjen e veprës penale “Shfrytëzim i prostitucionit”,

- A. Ndoja, 37 vjeç, lindur dhe banues në Tiranë, i pa dënuar më parë. Ndaluar për kryerjen e veprës penale “Mbajtje të lokaleve për prostitucion”

-Jani Murati (Gëzim Kasëmi), 59 vjeç, lindur dhe banues në Tiranë, i pa dënuar. Ndaluar për kryerjen e veprës penale “Shfrytëzim prostitucioni”,

- Altin Sulejmanasi, 44 vjeç, lindur dhe banues në Tiranë, i pa dënuar. Ndaluar për kryerjen e veprës penale “Shfrytëzim prostitucioni”,

- Elton Mimini, 23 vjeç, lindur dhe banues në Tiranë, i pa dënuar. Ndaluar për kryerjen e veprës penale “Shfrytëzim prostitucioni”,

- A.L., 44 vjeçe, lindur dhe banuese në Tiranë, e pa dënuar më parë. Arrestuar për veprën penale të “Prostitucionit”,

-F.P., 32 vjeçe, lindur në Fier dhe banuese në Tiranë, e pa dënuar. Arrestuar për veprën penale të “Prostitucionit” dhe Prodhim shitje të lëndëve narkotike.

- D.D., 42 vjeç lindur dhe banues në Tiranë, i dënuar më parë.

Gjithashtu janë proceduar në gjendje të lirë tre vajza D.D., 25 vjeçe, lindur në Tropojë dhe banuese në Tiranë, L.K., 25 vjeçe, lindur dhe banuese në Tiranë dhe B.C., 39 vjeçe, lindur dhe banuese në Tiranë, të padënuara më parë.

Operacioni për goditjen e këtij grupi të strukturuar kriminal, u finalizua nga Seksioni për Trafiqet e Paligjshme në Drejtorinë Vendore të Policisë Tiranë, mbas një hetimi pesë mujor me metoda speciale në bashkëpunim me Prokurorinë e Tiranës.

Të arrestuarit në kushtet e flagrancës në kuadër të operacionit dyshohen si autorë të veprave penale si “Shfrytëzim të prostitucionit”, “Mbajtje dhe vënie në përdorim të ambienteve për prostitucion”, “Prodhim dhe shitje të narkotikeve” si dhe “Prostitucionit”.

Në kuadër të procedimit penal viti 2017, është bërë e mundur të dokumentohet veprimtaria kriminale e shtetasve të sipërpërmendur, të cilët në kohë dhe vende të ndryshme në qytetin e Tiranës, kanë shfrytëzuar, ndërmjetësuar dhe marrë pagesa për prostitucion, që shkonin nga 50 deri 150 euro.

Organizatorët në këtë aktivitet Albina Kasaj, Jani Murati (i njohur ndryshe si Gëzim Kasëmi), Ruzhdi Gapi, Edmond Shkalla, Altin Sulejmanasi dhe Elton Mimini, në bashkëpunim me njëri-tjetrin, kanë shfrytëzuar për prostitucion vajza të moshave të ndryshme, për të ushtruar prostitucion me klientët e gjetur prej organizatorëve.

Aktiviteti kriminal lehtësohej nëpërmjet aktivitetit si taksist të shtetasve Ruzhdi Gapi dhe Gëzim Kasëmi, duke bërë të mundur transportimin e vajzave, që ushtronin prostitucion, në hotele dhe ambiente që njehsohen me to, të tilla si ambienti “Hotel” pranë kryqëzimit të “Tregut elektrik”, në pronësi të shtetasit A.Ndoja.

Gjatë arrestimeve të bëra, në disa prej ambienteve është gjetur lëndë narkotike e llojit kokainë e ndarë në porcione, të cilat janë sekuestruar.

Në këtë operacion janë sekuestruar në cilësinë e provave materiale: 2 automjete, 9 aparate telefonike, një dozë kokainë si dhe një shumë prej 100 mijë lekësh të vjetra.

Lidhur me këtë rast materialet do i kalojnë Prokurorisë së Tiranë për hetime të mëtejshme, për të zbuluar lidhjet dhe shtrirjen e mundshme të këtij rrjeti kriminal.