Kronikë

Arrestohet për mashtrim i rrëmbyeri që u mbajt në ahur

Foto: Koha / ilustrim

Policia e Kosovës përmes një komunikate për media bën të ditur se ka arrestuar për mashtrim personin i cili ishte rrëmbyer ditë më parë nga dy persona.

“Lidhur me rastin ‘rrëmbim’ të ndodhur me datën 05.06.2019, personi i paraqitur si viktimë e këtij rasti, gjatë intervistimit nga hetuesit e sektorit rajonal për hetime pranë Drejtorisë Rajonale të Policisë në Pejë, del se i njëjti ka mashtruar njërin nga personat e dyshuar të arrestuar në rastin e rrëmbimit, kinse do t’ia gjente atij veturën dhe një bagëti të cilat i janë vjedhur të njëjtit, duke i kërkuar një shumë të hollash të cilat nuk ia ka kthyer”, thuhet në komunikatë, transmeton Koha.net.

Arrestohen dy të dyshuar për rrëmbim të një personi, e mbanin të mbyllur në ahur

Me urdhër të prokurorit të shtetit rasti është cilësuar ‘mashtrim’ dhe i dyshuari, i cili në rastin e parë ishte viktimë e rrëmbimit, dërgohet në mbajtje.

Kujtojmë se dje Policia kishte arrestuar dy të dyshuarit për rrëmbimin e tij, të cilët e kishin mbajtur të lidhur në ahur.