Policia në Shqipëri ka arrestuar katër persona, pasi ata kishin kthyer banesën në një laborator për kultivimin e narkotikëve.

Siç ka njoftuar Policia e Shqipërisë në Facebook janë sekuestruar pajisjet e montuara në banesë të përshtatura për kultivimin e bimëve narkotike, fara dhe fidanë kanabisi, po ashtu dy automjete dhe sende tjera të kundërligjshme.

“Strukturat e DVP Tiranë nën drejtimin e Prokurorisë në zbatim të planit të masave për kontrollin e territorit me qëllim parandalimin e kultivimit të kanabisit si rezultat e një punë disa mujore kanë zhvilluar me sukses operacionin policor të koduar "Kimisti” në kuadër e të cilit u bë arrestimi në flagrancë për veprën penale "Kultivimi i bimëve narkotike" në bashkëpunim, të shtetasve : E. Sh., 30 vjeç, G.D., 37 vjeç, S. I., 44 vjeç dhe J. V., 17 vjeç Këta shtetas, në bashkëpunim me njëri-tjetrin, kishin përshtatur banesën e marrë me qira nga shtetasi E. Sh., me aparatura që shërbejnë për kultivimin e bimëve narkotike. Gjatë kontrollit të banesës u gjetën fidanë të dyshuar narkotik kanabis, të kultivuar në kushte laboratorike, fara kanabisi dhe 1 peshore elektronike të cilat u sekuestruan në cilësinë e provës materiale. Gjithashtu nga kontrolli i ushtruar në automjetet me të cilën këta shtetas qarkullonin u gjetën dhe u sekuestruan fidanë të dyshuar kanabis, të cilët u sekuestruan në cilësinë e provës materiale”, thuhet në njoftimin e Policisë së Shqipërisë.