Kronikë

Prokuroria ndalon dy persona nën dyshimet për dallavere me vota

Dy persona janë ndaluar të martën për keqpërdorim të detyrës zyrtare gjatë zgjedhjes dhe dhënie apo marrje të ryshfetit në lidhje me votimin, ka njoftuar Prokuroria Speciale e Kosovës.

Siç bëhet e ditur në komunikatë, të ndaluarit janë A.K. dhe S.M.

Prokurori i shtetit ka thënë se të mërkurën do të parashtrojë kërkesë për caktimin e masës së paraburgimit ndaj zyrtarëve të dyshuar për veprat në fjalë.

Ky institucion ka thënë se po vazhdon hetimet lidhur me rastin.

Dyshimet për keqpërdorime nga komisionerët në numërimin e votave të zgjedhjeve të 14 shkurtit janë ngritur nga të gjitha partitë. Shumë kandidatë për deputetë kanë paraqitur ankesa ndërsa më të theksuara kanë qenë akuzat brenda Aleancës për Ardhmërinë e Kosovës. Madje si pasojë e këtyre përplasjeve dhe raportimeve, Meliza Haradinaj-Stublla u dorëhoq nga kjo parti por edhe nga posti i ministres së Jashtme.