Ministri i Shëndetësisë, Armend Zemaj, është takuar sot me kryetarin e Fushë Kosovës, Burim Berisha, në të cilën ka diskutuar rreth situatës me COVID-19. Këtë e konfirmoi vet Zemaj përmes një statusi në Facebook.

“Me kryetarin e Fushë Kosovës, Burim Berishën dhe stafin e tij biseduam për shqetësimet e shkaktuara nga Covid19, shpalosëm pikëpamjet se si të zvogëlohet sa më shumë ky rrezik që po e kanos shëndetin e qytetarëve, sikurse për projektet që do të realizojmë në të ardhmen”, shkroi Zemaj.

Ai shtoi se “konfirmova se Fushë Kosova do të jetë në prioritetin e angazhimit tim dhe do të mbështes projektet e caktuara, e do të ofrohet ndihma për përmirësimin e shërbimeve shëndetësore”.

Zemaj ka qenë edhe në Qendrën Kryesore të Mjekësisë Familjare ku ka parë nga afër kapacitetet dhe angazhimin e stafit mjekësor.

“Me drejtuesit biseduam për menaxhimin e situatës dhe ndihmën logjistike që do t’i ofrojmë kësaj qendre. Mjekëve dhe infermierëve iu shpreha mirënjohje të thellë dhe i falënderova për sakrificën dhe punën e palodhshme që po bëjnë në këtë kohë të vështirë”, përfundoi Zemaj.