Një ditë para hyrjes në fuqi të masave rigoroze për kufizim të lëvizjes, me qëllim të pamundësimit të përhapjes së mëtejme të pandemisë COVID-19, në Zyrën e Punësimit në Prizren, janë paraqitur numër i konsiderueshëm i qytetarëve.
Ata kanë aplikuar fizikisht për t’u regjistruar si të papunë, por pa i përfillur masat kundër përhapjes së koronavirusit, raporton KOHA.
Drejtori i Qendrës për Punësim në Prizren, Hajrullah Hoxha, ka pohuar shpërndarjen dhe pranimin e aplikacioneve nga qytetarët që synojnë të përfitojnë si të papunë nga pakoja fiskale emergjente e Qeverisë së Kosovës.
“Në bazë të vendimit të Qeverisë së Kosovës, kjo është pakoja fiskale emergjente ku përfitojnë të papunët dhe ata që nuk e kanë asnjë anëtar të familjes të punësuar. Vetëm për këtë kategori ne si Zyrë e Punësimit i shpërndajmë aplikacionet dhe ata aplikojnë. Munden edhe online me apliku, përmes adresës zyrtare të Qeverisë së Kosovës gjegjësisht të MPMS-së”, ka thënë Hoxha.
Ai ka pranuar se ka pasur probleme sa i përket mbajtjes së distancës sociale.
po mundohemi me mbajtë rend dhe distancën sociale, por është e pamundur. Është një fluks i madh i të papunëve që vijnë me apliku. Kemi lajmëruar Policinë e Kosovës, ata po e mbajnë rendin, megjithatë po ka probleme të mëdha”, ka shtuar ai.
Ndërkaq komandanti i Stacionit Policor në Prizren, Qamil Kroni, ka thënë se pas njoftimit për këto tollovi policia ka dalë në terren.
"Ne i kemi shpërndarë patrullat, por ne i kemi edhe 10 pika statike, që e rrethojnë Komunën e Prizrenit, pasi që dihet se jemi në karantinë", u shpreh Kroni.
Kryetari i Komunës, Mytaher Haskuka, ka njoftuar se qytetarët mund të aplikojnë edhe ditëve në vijim.
“Vetëm se e kanë orarin e caktuar. Edhe nuk do të krijohen tollovi të tilla, por do të dalin vetëm në orarin e përcaktuar me numrin e parafundit personal”, ka thënë Haskuka.
Ministria e Punës dhe Mirëqenies Sociale të martën ka njoftuar se aplikimi në formë fizike nuk do të jetë i mundur më, shkaku i masave të fundit për parandalimin e COVID-19, pasi që rrezikohet shëndeti për të gjitha palët.
Kjo ministri ka kërkuar nga qytetarët që regjistrimin ta bëjnë online ose përmes e-mailit.
-
14 prill 2020 21:18
-
Shpërndaje në: