Komuna e Prizrenit synon që t’i funksionalizojë së paku tri nënstacione të zjarrfikësve, në Zhur, Gjonaj e Reçanë. Por për realizimin e këtij objektivi së pari duhet të rekrutohen zjarrfikësit e rinj.

Një gjë e tillë, sipas autoriteteve komunale, po merr kohë meqë procesi i rekrutimit të tyre ka nevojë për bashkërendim mes nivelit qendror dhe atij komunal. Informatat lidhur me këtë çështje i ka prezantuar kryetari i Komunës së Prizrenit, Mytaher Haskuka, para anëtarëve të Këshillit Komunal për Siguri në Bashkësi, gjatë mbledhjes së fundit të këtij organi lokal këshillëdhënës për çështjet e sigurisë, shkruan sot Koha Ditore.

Haskuka fillimisht ka përkujtuar se në fillim të këtij viti, shkaku i thatësisë ka pasur shumë raste të zjarreve, dhe se Komuna përkatësisht Drejtoria për Emergjencë dhe Siguri ka ndërmarrë disa hapa, në kuadër të të cilave bën pjesë edhe rekrutimi i punëtorëve sezonalë të zjarrfikësve. Por krahas kësaj ai ka theksuar se do të rekrutohen edhe 30 zjarrfikës të rregullt, në saje të të cilëve pritet që të zbutet problemi i numrit të mangët të zjarrfikësve në këtë Komunë.

(Artikullin e plotë mund ta lexoni sot në “Koha Ditore”)