Arbëri

Punëtorët e KEDS-it riparojnë me shkollën në Kamenicë nën moton “Me duart tona”

Mbi 500 nxënës të shkollës fillore “Fan Stilian Noli” të Kamenicës, nga e hëna do të kenë kushte shumë më të mira mësimi. Kjo, pasi shkolla e tyre është rinovuar nga punëtorët e KEDS-it, të cilët të dielën, në vend të pushimit, kanë zgjedhur të punojnë në mënyrë vullnetare, vetëm që nxënësit të kenë ambiente më të mira mësimi.

Kështu ka raportuar KEDS-i në një njoftim për media, duke theksuar se dhjetëra punëtorë të KEDS-it nga Distriktet e Gjilanit dhe Prishtinës kanë arritur ta ndryshojnë pamjen e brendshme të shkollës.

“U ngjyrosën muret, radiatorët, dyert, u shtrua laminat në disa pjesë. Kjo bëri që me një angazhim të pakursyer, kjo shkollë të mos jetë më në kushte të rënda, si për nxënës, ashtu edhe për mësimdhënës. Gjithçka është bërë nën moton “Me duart tona”, pra vetëm përmes duarve. Simbolika e tillë e aksionit është organizuar në mënyrë që të nxirret në pah se puna komunitare vlen dhe përmes saj brenda një dite mund të përmirësohen kushtet e qindra nxënësve”, thuhet në komunikatë.

Kjo iniciativë, sipas KEDS-it, ka bërë të lumtur edhe drejtorin e shkollës, Mustafë Rrudhanin.

“E falënderoj KEDS-in që e përzgjedhi shkollën tonë. Kjo për ne është sihariq. Jam i lumtur për këtë”, tha ai.

I pranishëm ishte edhe Drejtori për Arsim në Komunën e Kamenicës, Agim Shkodra. “Kjo është ide jashtëzakonisht e mirë. Jam shumë i lumtur që po shoh punëtorët e KEDS-it që po punojnë në shkollën tonë. Kjo duhet të zgjerohet edhe në shkollat tjera nga kompanitë tjera”, tha ai.

KEDS-i thotë se, punëtorët, kur e panë mundësinë t’i gëzojnë fëmijët, nuk hezituan për asnjë moment. “Sot jam këtu në aksionin për rregullimin e kësaj shkolle. Më vjen shume mirë që jam me kolegët e mi këtu, sepse do t’i gëzojmë fëmijët me këtë. Asgjë nuk më vjen vështirë që t’i bëjë fëmijët të lumtur. Po më pëlqen aksioni dhe kisha pasur dëshirë që të ketë më shumë kësi lloj aksione, sepse mes tjerash ndodh dhe shoqërimi mes njerëzve”, thotë punëtorja e KEDS’it nga Ranillugu, Jellena Joniq.

As Sabri Boroci, punëtor i KEDS nga Kamenica nuk hezitoi. “Nuk hezitova fare kur m’u dha mundësia që të kontribuoj që gjeneratat e reja që mësojnë këtu ta ndiejnë veten mirë. Në çdo aksion, kudo qoftë, veçmas në shkolla duhet të kontribuojmë”, tha ai.

Edhe punëtorët e ardhur nga Prishtina, sipas komunikatës, thanë të mos kenë përtuar të marrin pjesë në këtë aksion.

“I jam bashkuar aksionit vullnetar të kompanisë sonë me qëllim që fëmijëve tonë t’iu ofrojmë kushte më të mira në shkollë dhe të tregojmë se me duart tona, duke u treguar vullnetarë, mund të ju ndihmojmë atyre që të kenë ambient më të mirë për punë dhe për mësim”, tha Syrmie Kika, punëtore e KEDS-it.

Aksioni i sotëm nuk është i vetmi që ndërmarrin punëtorët e KEDS-it rreth përmirësimit të kushteve në shkolla.

Disa muaj më parë janë kompletuar laboratorë të informatikës me kompjuterë dhe pajisur me internet 7 shkolla në territorin e vendit, përderisa janë shpërndarë edhe qindra libra për nxënës.

Aksione të ngjashme punëtorët e KEDS-it do të organizojnë edhe në të ardhmen.