Botë

Futet autokolona me ndihma në Gutën lindore

Kombet e Bashkuara dhe Kryqi i Kuq Ndërkombëtar njoftuan të hënën se një autokolonë me ndihma humanitare u fut në zonën e rrethuar të Gutës lindore në Siri që ndodhet nën kontrollin e rebelëve.

Sipas Kryqit të Kuq autokolona me 46 kamionë transportonte ushqime për 27,500 njerëz si dhe furnizime mjekësore, ndërkohë që zyra humanitare e Kombeve të Bashkuara njoftoi se "shumë prej furnizime shëndetësore që mund të shpëtonin jetë nuk ishin lejuar të ngarkoheshin".

Autokolona e së hënës është e para që lejohet të hyjë në Gutës lindore prej gati tre javësh.

Këshilli i Sigurimit i Kombeve të Bashkuara kërkoi një armëpushim 30-ditor në të gjithë Sirinë me qëllim shpërndarjen e ndihmës tek popullsia civile, përfshirë 400 mijë vetë që ndodhen në Gutës lindore. Por edhe pse ka kaluar më shumë se një javë prej miratimit të rezolutës, ka pak shenja për hyrjen në fuqi të armëpushimit, raporton VOA.

Në të njëjtën kohë Rusia, e cila mbështet presidentin sirian Bashar al-Assad, njoftoi vendimin për një ndalim të përditshëm të luftimeve prej pesë orësh.

Rusia së bashku me qeverinë siriane kanë akuzuar rebelët se kanë penguar civilët që të largohen nga periferia e Damaskut.

Rebelët i kanë mohuar këto akuza duke thënë se pala pro-qeveritare ka vazhduar të godasë Gutën lindore dhe se njerëzit kanë frikë se çfarë mund t’u ndodhë nëse largohen nga zona që ndodhet nën kontrollin e opozitës prej katër vitesh.

Sipas observatorit sirian për të Drejtat e Njeriut me seli në Britani së fundmi forcat qeveritare kanë rimarrë një të tretën e Gutës lindore. Në më shumë se dy javë luftime që kanë përfshirë edhe sulme me raketa janë vrarë rreth 700 civilë.

Të dielën Bashar al-Assadi bëri të ditur se ofensiva do të vazhdojë, edhe pse udhëheqësit amerikanë dhe britanikë e akuzuan atë për krijimin e një fatkeqësie humanitare.