Botë

Trump nënshkruan sanksionet e reja kundër Rusisë, Koresë V. dhe Iranit

Shtëpia e Bardhë ka thënë se presidenti i Shteteve të Bashkuara, Donald Trump e ka nënshkruar projektligjin i cili e sanksionin Rusinë, Korenë Veriore dhe Iranin.

Ligjvënësit amerikanë e kanë miratuar projektligjin i cili targeton kompanitë ruse të energjisë, dhe sipas së cilit presidenti Trump duhet të kërkojë aprovimin e Kongresit, në mënyrë që të lehtësojë sanksionet kundër Moskës, shkruan rel.

Presidenti rus, Vladimir Putin është përgjigjur ashpër ndaj miratimit të legjislacionit nga ana e Kongresit, para se presidenti Trump ta nënshkruante atë, duke urdhëruar që Uashingtoni ta zvogëlojë stafin diplomatik në Rusi.

Kjo përgjigje nga Rusia ka përshkallëzuar tensionet me SHBA-në, të cilat edhe ashtu kanë qenë të ngritura për shkak të agresionit rus në Ukrainë, rolit të saj në Siri dhe ndërhyrjes së supozuar në zgjedhjet presidenciale të vitit 2016 në SHBA.

Kremlini e ka cilësuar legjislacionin si “agresion ekstrem” dhe ka akuzuar Uashingtonin për tentim të “izolimit” të Rusisë me sanksione dhe masa të tjera.

Ligjvënësit amerikanë e kanë modifikuar legjislacionin pas ankesave të liderëve evropianë, pasi sipas tyre i njëjti ishte shumë i dëmshëm për kompanitë evropianë që punojnë në projektin e gazsjellësit me Rusinë.

Ministria e Ekonomisë në Gjermani i ka bërë thirrje Bashkimit Evropian t’i luftojë sanksionet e reja të SHBA-së, duke thënë se ato do të pengonin edhe vendet perëndimore në të bërit biznes.