Botë

Pas garancisë së EMA-së, vendet evropiane pro përdorimit të “AstraZenecas”

Franca, Italia dhe Gjermania kanë njoftuar menjëherë se do ta rifillojnë përdorimin e vaksinës që nga e premtja. Teksa Spanja, Portugalia dhe Holanda kanë bërë të ditur se do ta bëjnë të njëjtën gjë gjatë javës së ardhshme, ani pse Spanja mund t’i përjashtojë grupet e caktuara për ta minimizuar çdo rrezik të mundshëm

Rregullatori i Bashkimit Evropian për Barna ka konfirmuar të enjten se vaksina kundër COVID-19 e kompanisë “AstraZeneca” nuk e shkakton mpiksjen e gjakut dhe se përfitimet nga përdorimi i saj peshojnë më rëndë sesa rreziqet e mundshme, duke e hapur kësisoj rrugën që vendet evropiane ta vazhdojnë administrimin e kurës.

Franca, Italia dhe Gjermania kanë njoftuar menjëherë se do ta rifillojnë përdorimin e vaksinës që nga e premtja. Teksa Spanja, Portugalia dhe Holanda kanë bërë të ditur se do ta bëjnë të njëjtën gjë gjatë javës së ardhshme, ani pse Spanja mund t’i përjashtojë grupet e caktuara për ta minimizuar çdo rrezik të mundshëm.

Sytë e Evropës të enjten ishin kthyer nga ekspertët e EMA-së, e cila pritej t’i jepte konkluzionet rreth analizës së disa rasteve të trombozës dhe mpiksjes së gjakut te personat që e kishin marrë vaksinën anti-COVID-19 të kësaj kompanie. Për shkak të disa incidenteve, përfshirë edhe rastet e vdekjes, shumica e shteteve anëtare të Bashkimit Evropian kishin pezulluar përkohësisht vaksinimin me këtë kurë. Në mesin e tyre ishin edhe shtetet të mëdha dhe serioze, si Gjermania, Franca, Italia, Holanda dhe shumë të tjera. Madje, ishin në pakicë ato që kishin vazhduar vaksinimin.

situatë përbrenda BE-së kishte ndikuar që të rritet edhe mosbesimi në autoritetet e përbashkëta apo në rregullatorët kombëtarë në vendet anëtare, ngase nuk kishin të njëjtin mendim. Prandaj, konstatimi i EMA-së pritej dhe nga shtetet që vazhdonin vaksinimin me “AstraZenecan”, e që kishin paralajmëruar se në rast që EMA-ja vendos se vaksina nuk është e sigurt, atëherë do ta ndërpresin përdorimin e saj. Vendimin e prisnin edhe shtetet që e kishin pezulluar dhe që kërkonin një “dritë jeshile” prej EMA-së për vazhdimin e vaksinimit.

Drejtoresha ekzekutive e kësaj agjencie, Emer Cooke, pas një takimi të gjatë të ekspertëve në Komisionin për vlerësimin e rrezikut në kuadër të kësaj agjencie, e ku ishin të pranishëm dehe ekspertët nga shtetet anëtare, ka thënë se kura e “AstraZenecas” është e “sigurt dhe efikase” dhe ka shtuar se “nuk kanë gjetur dëshmi për ta lidhur atë në mënyrë direkte me rastet e mpiksjes së gjakut”.

Sipas saj, “përfitimet nga vaksinimi me këtë vaksinë janë shumë më të mëdha sesa efektet anësore të saj”.

Ekspertët e EMA-së kanë thënë se kur vaksinohen me miliona njerëz, atëherë gjithmonë priten edhe efekte anësore, përfshirë edhe ato me pasoja të rënda, prandaj do të vazhdojnë që secilin rast ta analizojnë në mënyrë të hollësishme dhe do të monitorojnë, në bashkëpunim me autoritetet kombëtare të shteteve anëtare, procesin e mëtejmë të vaksinimit.

Edhe ekspertët në Belgjikë, të cilët kanë dhënë një kontribut kyç në vlerësimin e EMA-së, kanë nënvizuar se numri i incidenteve të raportuara është i vogël krahasuar me mbi 30 milionë personat, si në BE, ashtu edhe në Britani të Madhe, që deri më tani janë vaksinuar me “AstraZeneca”.

Vaksina e “AstraZenencas”, e prodhuar në bashkëpunim me universitetin prestigjioz të Oxfordit, është vënë në qendër të vëmendjes edhe për shkak të dyshimeve në siguri, por edhe për shkak se BE-ja është përfshirë në një konflikt të hapur me kompaninë, pasi që ajo nuk po i përmbush detyrimet për distribuimin e numrit të vaksinave sipas kontratës.

Vaksinat e kësaj kompanie ishin të preferuara nga disa shtete, edhe për arsye se janë më të lirat në treg. Konfirmimi për vaksinën përbën një lajm të mirë edhe për Kosovën, e cila sasinë e parë të vaksinave pritet ta sigurojë pikërisht nga ky prodhues.