Presidenti i zgjedhur në Shtetet e Bashkuara, Joe Biden, do të emërojë këshilltarin e tij të vjetër dhe diplomatin veteran, Anthony Blinken, si Sekretar të Shtetit, njoftoi ekipi i tranzicionit, më 23 nëntor.

Blinken, përmes një postimi në rrjetin social Twitter tha se është i nderuar me nominimin.

"Nëse konfirmohet, ky është një mision që do ta marr me gjithë zemër", shkroi Blinken në rrjetin social Twitter.

Në njoftim janë bërë të ditur edhe emra tjerë që do të zënë vend në administratën e ardhshme amerikane.

Njoftimi konfirmoi raportet e shumta në mediat amerikane në lidhje me emërimet.

Bideni do të bëjë njoftimet zyrtare më 24 nëntor.

Nëse nominohet dhe konfirmohet nga Senati, Blinken do të ketë detyrë krijimin e një qasje të re të diplomacisë amerikane dhe bashkëpunimit global, pas katër vjetëve të politikës “Amerika e Para” e presidentit aktual, Donald Trump, e cila është përcjellë me ndasi në institucionet ndërkombëtare dhe përplasje me aleatët dhe konkurrentët.

Jake Sullivan, një këshilltar i vjetër i Bidenit dhe ish-Sekretares së Shtetit dhe ish-kandidates presidenciale, Hillary Clinton, do të bëhet këshilltar i Sigurisë Kombëtare të Shtëpisë së Bardhë.

Ish-sekretari i Shtetit, John Kerry, do të emërohet i dërguar i posaçëm presidencial për çështjet e klimës dhe do të jetë pjesë e Këshillit të Sigurisë Kombëtare.

Pasi të marrë pozitën e presidentit, Biden planifikon të rikthehet në Marrëveshjen e Parisit për Klimën dhe të kthejë mbrapsht anëtarësimin në Organizatën Botërore të Shëndetësisë.

Linda Thomas-Greenfield do të bëhet ambasadore në Kombet e Bashkuara dhe Avril Haines do të zërë postin e drejtores së Inteligjencës Kombëtare, duke u bërë gruaja e parë në atë pozitë. Duke reaguar pas njoftimit për nominimin e saj, Thomas-Greenfield tha se “do të punoj për të për të rinovuar marrëdhëniet me aleatët”.

Alejandro Mayorkas do të emërohet kreu i Departamentit të Sigurisë Kombëtare, personi i parë me prejardhje latine që udhëheq me këtë pozitë, nga e cila mbikëqyr agjencitë kryesore të zbatimit të ligjit dhe imigracionit.

Të gjitha pozitat duhet të konfirmohen nga Senati.

Njoftimi vjen derisa Bideni vazhdon të vendosë bazat e administratës së tij, pavarësisht përpjekjeve të presidentit amerikan, Donald Trump për të përmbysur rezultatin e zgjedhjeve.

Me Blinkenin në krye të diplomacisë amerikane, administata Biden do të synojë të shmangë përshkallëzimin e tensioneve me Iranin, të rindërtojë marrëdhëniet me aleatët dhe të menaxhojë marrëdhëniet tejet të tensionuara me Kinën. \ Rel