Ligjvënësit rusë mbështetën të enjten kontrollet më të serta të Internetit në vend me qëllim të mbrojtjes nga ndërhyrjet e jashtme, duke e kaluar me shumicë votash në Parlament draftligjin që kritikët e cilësojnë si mjet për thellimin e kontrollimit të Qeverisë mbi Internetin dhe përdorimin e tij për shtypjen e disidencës.
Duke e shpërfillur pakënaqësinë e politikanëve opozitarë dhe të aktivistëve të të drejtave të njeriut, Dhoma e Ulët e Parlamentit rus e kaloi në lexim të dytë versionin kryesisht të pandryshuar të ligjit, i cili synon ngufatjen e “sovranitetit” të Internetit në Rusi, ka raportuar “Reuters”, transmeton “Koha Ditore”.
Ligji synon ta kanalizojë trafikun dhe të dhënat e Internetit rus përmes mjeteve të kontrolluara nga autoritetet shtetërore. Në këtë synim, planifikohet krijimi i një Sistemi kombëtar të Domenit të brendshëm, ashtu që Interneti të vazhdojë së funksionuari edhe nëse Rusia shkëputet nga infrastruktura ndërkombëtare. Përpiluesit e ligjit pretendojnë se masa është e domosdoshme për mbrojtjen e vendit, pasi që Shtetet e Bashkuara të Amerikës i zbatuan ato që ata i quajtën politika të reja agresive të sigurisë kibernetike gjatë vitit të kaluar.
SHBA-ja ka akuzuar Rusinë për ndërhyrje në zgjedhjet presidenciale të 2016-s, një akuzë kjo që është hedhur poshtë nga Moska, e cila tani pretendon se është e rrezikuar nga ndërhyrjet e jashtme.
Në rast se pakoja e masave miratohet në leximin e tretë dhe të fundit në Parlament dhe e siguron aprovimin e Dhomës së Lartë dhe nënshkrimin e presidentit, Vladimir Putin, atëherë do të shndërrohet në ligj dhe të hyjë në fuqi më 1 nëntor.
-
11 prill 2019 15:10
-
Shpërndaje në: