Shkëmb Manaj, djali i Shaban Manajt i cili u vra në vitin 2000, ka reaguar ndaj deklaratës së Nasim Haradinajt, përfaqësuesit të Organizatës së Veteranëve të Luftës së UÇK-së, i cili tha “Punë e madhe nëse janë vrarë anëtarët e LDK-së”.

Përmes një statusi në Facebook, ai tha se deklarata e tij tregon më së miri që vrasjet e veprimtarëve të LDK-së janë kryer nga po kjo mendësi që e përfaqëson vetë Haradinaj.

Ka thënë se njerëz si Nasim Haradinaj, janë kapluar nga frika e ndriçimit të vrasjeve me motive politike nga Gjykata Speciale, transmeton Koha.net.

Statusi i Manajt në Facebook:

Mjerë vlerat e luftës kush i përfaqëson.

Deklarata e Nasim Haradinaj tregon me së miri që vrasjet e veprimtarëve të LDK-së janë nxitur dhe kryer nga kjo mendësi të cilën e përfaqëson Haradinaj. Paramendojeni cila ka qenë fryma dhe deklaratat e tij të dhëna para 20 viteve, kur kanë filluar ekzekutimet e burrave të mirë të Kosovës. Kjo frymë i ka nxitur vrasjet ndërshqiptare.

Unë e di që këtë lloj të njerëzve e ka kapluar frika. Frika nga ndriçimi i vrasjeve me motive politike nga Gjykata Speciale.

Kur të zbardhen këto vrasje makabre, këta do të turpërohen, para familjeve të tyre, para qytetarëve dhe kombit tonë.

Drejtësia do ta thotë fjalën e vet.

Ka ardh koha kur " Bira e minit bon 300 grosh", prandaj janë tmerruar të tillët !