Daçiq në Bruksel akuzon Kosovën rreth Asociacionit

Daçiq në Bruksel akuzon Kosovën rreth Asociacionit

12 dhjetor 2017 23:44

Shefi i diplomacisë serbe Ivica Daçiq po qëndron në Bruksel. Atje ai ka kërkuar që Serbia, pas Malit të Zi, të shpallet lidere e Ballkanit Perëndimor në rrugën e integrimeve europiane.

Duke folur për këtë proces të Serbisë, ai e ka përmendur edhe Kosovën, transmeton Koha.net.

Ai ka përkujtuar se si kryeministër i Serbisë në vitin 2012 ka filluar dialogun për normalizimin e marrëdhënieve me Kosovën, në të cilin sipas tij, liderët politikë të Serbisë kanë deponuar kredibilitetin e vet.

“Ju siguroj se Beogradi mbetet i sinqertë në këtë proces dhe këtë gjë ai e ka dëshmuar disa herë me zbatimin e marrëveshjeve”, citon FoNet të ketë thënë Daçiq.

Në të njëjtën ai ka akuzuar se “asnjë përparim nuk është arritur në formimin e Asociacionit të Komunave Serbe”, edhe pse, sipas tij, “mu kjo çështje ka dominuar në dispozitat e Marrëveshjes së Brukselit”.

Ai ka shtuar se është e domosdoshme që “edhe pala tjetër të marrë përgjegjësi dhe të fillojë së përmbushuri premtimet”.

“Jam i bindur se i gjithë Unioni e përkrah Beogradin në këtë qëllim pa marrë para sysh qëndrimet e ndryshme të vendeve anëtare për statusin ndaj Kosovës”, ka thënë Daçiq.

© KOHA. Të gjitha të drejtat janë të rezervuara.

Komentet

Shto koment

Të ngjashme