Provimi i Jurisprudencës i Lumezit i manipuluar

Provimi i Jurisprudencës i Lumezit i manipuluar

24 tetor 2017 19:01

Dosja për dhënien e provimit të Jurisprudencës e kryeprokurorit të shtetit Aleksandër Lumezi, është e manipuluar, raporton KTV.

Ekipi i KohaVisionit bashkë me ekipin e “Betimi për Drejtësi” ka disa ditë që kanë hulumtuar nga afër dosjen e Lumezit në Arkivin e Kosovës.

Emri i Lumezit është shkruar në tri variante në tri dokumente të ndryshme. Ndërsa, nën efektin e dritës vërehet qartë se nën emrin e Lumezit figuron një tjetër emër, ai i Zymer Krasniqit nga Deçani.

Zymer Krasniqi nga Deçani është emri mbi të cilin është shënuar emri i Lumezit në këtë libër, numri i të cilit përputhet edhe me dosjen e provimit të dhënë nga Lumezi në prillin e vitit 1991.

Në këto tri dokumente emri i Lumezit është shënuar në tri forma të ndryshme. Në dosje është me alfabet latin, në librin e paraqitjes së provimit mbiemri Lumezi është Llumezi, sipas alfabetit cirilik, derisa në librin amzë mbiemri është Ljumezi.

Një detaj tjetër është ai se vetëm tek emri i kryeprokurorit mungon vendlindja, derisa prapa ngjyrës së bardhë vërehet qartë emri i qytetit “Deçan”, që është i shkruar në cirilikë.

Nën efektin e dritës vërehet edhe emri Zymer Krasniqi.

Në Arkivin e Shtetit nuk kanë asnjë procesverbal se si arritën libra aty dhe se cila është arsyeja që vetëm librat mbi dhënien e provimit të Jurisprudencës nuk janë origjinalë, por janë kopje.

Në fillim, stafi ia arkivit i ka prezantuar ekipit të KTV-së si procesverbal këtë dokument, por që në fakt, pas përkthimit, doli të jetë procesverbal për librat amzë të Sekretariatit krahinor për komunikacion dhe lidhje.

Ruzhdi Panxha, drejtor për Veprimtari arkivore tash thotë se këta libra ka gjasë të jenë sjellë në Arkivin e shtetit, gjatë periudhës së pasluftës në vitin 1999-2000 dhe deri në vitin 2004 nuk është marrë askush me ta.

Dyshimet se kryeprokurori i shtetit e ka falsifikuar provimin e Jurisprudencës i ngriti ish-kreu i Gjykatës Kushtetuese, Enver Hasani, i cili thotë se i nisi hulumtimet kur i pa tendencat e pushtetit për ta persekutuar atë.

Ai akuzon kryeprokurorin se punon për të paktën 4 politikanë, në mesin e të cilëve është presidenti Thaçi e ministri i Jashtëm, Behgjet Pacolli.

Vetë kryeprokurori, Aleksandër Lumezi, nuk u është përgjigjur thirrjeve të KTV-së për një intervistë rreth kësaj çështjeje.

Por, ai e ka ftuar Prokurorinë e EULEX-it që ta hetojë dosjen e tij.

© KOHA. Të gjitha të drejtat janë të rezervuara.

Komentet

Ganiu31/10/2017 09:53

I pari i shteti manipulant!!!!!!!! E të tjerët????

Vakti26/10/2017 11:08

Marrja e zoti, Prokurori i Shtetit me diplamë fallso! Tashi duhet burgë për ata të cilët e zgjodhën prokurorë pa verifikim paraprak. Kjo nuk guxon të lejohet pa u ndëshkue. Përgjegjësit dihen! Ata janë koomisioni i cili ka dhanun dritën jeshile për zgjedhjen e Prokurorit me dosje të manipuluar. Shqiptarët nuk duhet të kërkojnë armiq jashtë Shtetit të Kosovës! Armiqtë e Shtetit janë manipuluesit, korruptuesit, familjarizmi, nepotizmi etj dukuri negative, që tani ma te shqiptarët janë ba kulturë e tyre. Pa çrronjosjen e kësaj kulture të pistë shqiptarët s`do të mundin të mbajnë Shtet.

Simnica25/10/2017 10:29

Une mendoje qe shume e shume njerz te tjere kan bere ate qe ka bere ky. Po falsifiuesit me te medhej jane ata qe i mbyllin syte para kesaj.

Shto koment

Të ngjashme