Arbëri

Berisha: Termocentrali Kosova e Re nuk duhet ndërtuar, sjell më shumë dëme se përfitime

Një drejtuese e Shoqërisë Civile në Kosovë thotë se termocentrali Kosova e Re, do të sillte më shumë dëme sesa përfitime për vendin dhe për këtë arsye nuk duhet ndërtuar.

Dajana Berisha, përfaqësuese e Konsorciumit të Shoqërisë Civile për Zhvillim të Qëndrueshëm në Kosovë, tha në një intervistë për Zërin e Amerikës, se strategjia e energjisë në Ballkan duhet të përqendrohet tek zhvillimi i tregut rajonal dhe burimet e qëndrueshme.

Berisha, drejtore ekzekutive e Forumit për Iniciativë Qytetare foli edhe për nevojën e filantropisë dhe përmirësimit të statusit të gruas në Kosovë, përfshirë intensifikimin e përpjekjeve për të ndihmuar gratë dhunuara gjatë luftës. Fillimisht Berisha, iu përgjigj pyetjes se për çfarë bisedoi me përfaqësuesit e Bankës Botërore, të cilët konsorciumi ka kohë që përpiqet t'i bindë të heqin dorë nga projekti i termocentralit.