Arrihet marrëveshja mes qeverisë dhe banorëve të Shipitullës e Hades

Arrihet marrëveshja mes qeverisë dhe banorëve të Shipitullës e Hades

13 shtator 2017 18:56

Kryeministri i Kosovës, Ramush Haradinaj, ka vazhduar sot takimet me delegacionet e fshatrave Shipitullë dhe Hade me të cilët dje pati një bisedë të gjatë deri në orët e vona.

Sipas një njoftimi nga kryeministria, Haradinaj ka dëgjuar shqetësimet dhe problemet e delegacioneve të dy fshatrave të Komunës së Obiliqit për çështjen e shpronësimit të pronave të pasura me thëngjill, të domosdoshëm për furnizimin e rregullt të Korporatës Energjetike të Kosovës.

Tani, në njoftimin për media theksohet se është arritur marrëveshja dhe, sipas Haradinajt, me këtë marrëveshje mundësohet që KEK-u të rinisë punën për të garantuar furnizimin e pandërprerë të energjisë elektrike.

“Në bisedë me delegacionet e të dyja fshatrave të Komunës së Obiliqit, kryeministri Haradinaj ka arritur pajtueshmërinë për zgjidhjen e shqetësimeve të tyre sipas modelit dhe praktikës së mëhershme të zbatuar në rastin e fshatit Hade. Njëkohësisht është arritur pajtueshmëri e plotë që konform legjislacionit në fuqi këta banorë të gëzojnë të drejtën e përparësisë në zgjidhjen e shqetësimeve të punësimit. Kryeministri Haradinaj tha se kjo marrëveshje mundëson që eskavatorët e KEK-ut menjëherë të rinisin punën në mënyrë që të garantojë furnizimin e pandërprerë të energjisë elektrike. Përveç kësaj Kosova mbi të gjitha përfiton, meqë një nga problemet e qytetarëve të saj është zgjidhur në harmoni të plotë me kërkesat e tyre”, thuhet në njoftim.

© KOHA. Të gjitha të drejtat janë të rezervuara.

Komentet

Shto koment

Të ngjashme