Bie dukshëm numri i pjesëmarrësve nga Kosova në luftërat e Sirisë dhe Irakut

Bie dukshëm numri i pjesëmarrësve nga Kosova në luftërat e Sirisë dhe Irakut

05 shtator 2017 13:39

Numri i qytetarëve të Kosovës që po i bashkohen luftërave në Siri dhe Irak gjatë muajve të fundit ka rënë dukshëm. Këtë e ka konfirmuar Blerim Rama nga Departamenti kundër terrorizmit në Policinë e Kosovës.

Ai theksoi se numri i qytetarëve të Kosovës që janë pjesë e luftërave në Siri dhe Irak ka rënë, madje dukshëm muajve të fundit.

“Megjithatë, sa për njoftim numri jo që ka rënë, por ka rënë dukshëm. Kjo duke iu falënderuar punës së përgjithshme të shoqërisë, mediave, institucioneve fetare dhe institucioneve të sigurisë normal, por edhe faktorit ndërkombëtarë që vazhdimisht na ka përkrahur në këtë fushë”, tha Rama.

Këto komente ai i bëri në prezantimin e një raporti mbi ekstremizmin dhe radikalizmin në Kosovë nga portali Fol Tash.

Në prezantimin e të gjeturave të kësaj analize, kryeredaktori i portalit Fol Tash, Bekim Jashari, tha se hulumtimi është ndarë në dy etapa, ajo e para luftës në Kosovë dhe ajo e pas luftës.

Sipas Jasharit, para luftës së fundit në Kosovë shqiptarët nuk bën luftë fetare, e as përpjekje për të drejta dhe liri fetare, pasi kishte diçka që u mungonte, e ajo ishte liria.

“Feja në vitet e 90-ta nuk ishte cak i forcave serbe, njerëzit kryenin ritet fetare, por preokupim kyç mbetej liria. BIK-u kishte arritur që me sukses ta kultivojë frymën e islamit unik dhe të ruajë predikimin e islamit nën drejtimin e shkollës juridike hanefide, ndërsa shkollat tjera për qytetarët ishin të panjohura në Kosovë nuk dihej shumë për fraksionet dhe për lëvizjet politike që vepronin në botën arabe, nuk kishin njohuri rreth shiizmit, sunizmit, e po ashtu edhe lëvizjet që vepronin politikisht në petkun islam si vehabizmi, Hamasi dhe vëllazëria myslimane po thuajse xhemati as nuk e kishte idenë çfarë ishte. Xhemati dinte vetëm për Arabinë, Qabenë dhe Mekën”, tha Jashari, raporton KP.

Por, sipas këtij hulumtimi, problemet filluan pas luftës. Jashari theksoi se ardhja e shumë OJQ-ve nga vendet arabe, bëri që kjo etapë të bëhet paralele me Bashkësinë Islame, pasi ardhja e OJQ-ve nga vendet arabe me qëllim ndihmën humanitare, renovimin e shtëpive, shpërndarja e ndihmave me fletushka me islamin ndryshe dhe financimin e studentëve në vendet arabe nën diktatin e tyre.

“Pastaj, shndërrohet islami në pamje dhe dukje në emër të asaj që ne po e sjellim një islam të ri dhe ne po e bëjmë një rizgjim islam në Kosovë, ata filluan etapën e dytë ku filluan të luftojnë bidatet, e që është ideologji dhe start pikërisht i Muhamed Abdul Vehabit, i cili kishte vepruar në Arabinë Saudite në rrethana të caktuara, në një mentalitet të caktuar, ndoshta në disa raste mund të kishte të drejt, por edhe nëse plotësisht ka pasur të drejtë aktualiteti ku ai ka vepruar ka qenë që i përshtatet atij vendi e jo më gjerë. Pastaj, tendenca ishte se islami duhet të jetë dhe është në çdo fushë”, u shpreh Jashari.

Shemsi Jashari nga OJQ “Demokracia fillon këtu”, ka dhënë disa rekomandime të cilat dërgojnë në de-radikalizëm.

“Si pikë e parë, një nevojë për identifikimin e gjendjes aktuale dhe veprimtarisë fetare që e zhvillojnë ata që nuk janë kompetentë të merren me çështje fetare dhe nuk e kanë përgatitjen e duhur në aspektin akademik dhe nuk i njeh institucionet siç janë BIK-u që merret me organizimin e jetës fetare. Pastaj, institucionet shtetërore duhet të fuqizojnë ligjin që mbikëqyr financimin e këtyre organizatave që fshehën nën emrin e OJQ-së diçka që është e lehtë të regjistrohet dhe diçka që deri tash është treguar se shteti ka pasur vështirësi për t’i kontrolluar deri në atë masë që mos të prodhuar një ndikim negativ”, tha Jashari.

Burim Ramadani tha se qasja duhet të jetë shumëdimensionale në vazhdimësi në trajtimin e ekstremizmit të dhunshëm të gjitha llojeve duke përfshirë edhe këtë që bazohet në interpretimin strikt ose manipulues të fesë, e cila në rastin e Kosovës ka dhënë viktima.

“Ne asnjëherë nuk duhet të harrojmë se mbi 60 nëna qajnë në Kosovë për shkak se i kanë humbur fëmijët e vet dhe kjo është pasoja e deritashme. Shpesh e dëgjojmë që thuhet me lehtësi që në Kosovë nuk ka pasur akt terrorist, normalisht që s’ka pasur akt terrorist të orientuar kah kjo ideologji. Strategjia flet për dy lloj ekstremizmash, por sidoqoftë pasojat dhe njerëzit e Kosovës nuk janë më gjallë për shkak të kësaj ideologjie, nuk është me rëndës ku kanë humbur jetën, në Bosnje, a në Gjermani, a në Siria a në Irak, ata janë shtetas të Kosovës, ata janë shqiptarë të Kosovës dhe fakti që ka ardhur deri këtu duhet trajtuar në mënyrë shumëdimensionale”, theksoi Ramadani.

Sipas këtij hulumtimi qytetarët në Kosovë nuk kanë frikë nga fetë, pasi bindja e tyre është që feja nxit në paqe dhe dashuri, andaj përdorimi i fjalës islamofobi cilësohet si kontrovers.

Komentet

Shto koment

Të ngjashme