Arbëri

ATK-ja paralajmëron ata që fitojnë nga kriptovalutat: Duhet të deklarojnë të ardhurat

Administrata Tatimore e Kosovës ka paralajmëruar personat që fitojnë nga kriptovalutat që të deklarojnë të ardhurat, për ta paguar tatimin dhe kontributet pensionale.

Sipas ATK-ja, një gjë e tillë është e përcaktuar me legjislacionin tatimor.

“Administrata Tatimore e Kosovës, rikujton të gjithë personat fizikë jo afarist, personat fizikë afarist dhe personat juridikë, se janë të detyruar të deklarojnë dhe të paguajnë tatimet dhe kontributet pensionale në mënyrë reale dhe në kohë, ashtu siç është përcaktuar me legjislacionin tatimor. Aktivitetet e ATK-së, në vazhdimësi, do të përqendrohen pikërisht te personat, të cilët nuk i deklarojnë të ardhurat e krijuara dhe nuk paguajnë tatimin dhe kontributet pensionale. Me fokus të veçantë, ATK-ja do të përqendrohet në identifikimin dhe trajtimin e personave, të cilët krijojnë të ardhura nga kriptovalutat”, thuhet në njoftim.

ATK-ja ka bërë me dije se në rast që personat që fitojnë nga kriptovalutat nuk deklarojnë të ardhurat dhe nuk paguajnë tatime e kontributet pensionale, do të ndërmerren masat sipas legjislacionit tatimor.

“Për personat fizikë jo afarist, personat fizikë afarist dhe personat juridikë, të cilët nuk deklarojnë të ardhurat e krijuara dhe nuk paguajnë tatimet dhe kontributet Pensionale, ATK do të ndërmarrë masat sipas legjislacionit tatimor. Administrata Tatimore e Kosovës, u bënë thirrje të gjithë personave që të deklarojnë të ardhurat e krijuara apo të korrigjojnë sa më parë deklaratat e tyre dhe të përmbushin të gjitha detyrimet tatimore të parapara me legjislacionin tatimor. Me kryerjen e detyrimeve tatimore, kontribuoni direkt në financimin e programeve qeveritare siç janë: ofrimi i shërbimeve publike, arsimim me standarde të larta, mirëqenie shëndetësore dhe sociale, mbrojtje ligjore dhe siguri, si dhe infrastrukturë të përgjithshme për një mirëqenie më të mirë ekonomike dhe shoqërore”.