Arbëri

Osmani-Borrellit: Faza e re e dialogut të udhëhiqet nga parimi i trajtimit të barabartë

Presidentja e Kosovës, Vjosa Osmani, gjatë qëndrimit në Turqi është takuar me Përfaqësuesin e Lartë të BE-së për Politikë të Jashtme, Josep Borrell.

Me Borrellin, Osmani ka folur me dialogun Kosovë – Serbi të lehtësuar nga BE-ja.

Osmani është duke qëndruar në Antalia të Turqisë për Samitin e Procesit të Bashkëpunimit në Evropën Juglindore.

“Lidershipi i ri i vendit ka prioritet reformat e nevojshme për ta çuar përpara procesin e integrimit të vendit tonë në Bashkimin Evropian dhe në NATO. Ne kemi treguar gatishmëri të marrim pjesë në dialog, por në një proces të përgatitur mirë, i cili do të rezultojë me marrëveshje përfundimtare për njohjen e ndërsjellë dhe do ta respektojë sovranitetin dhe integritetin e Kosovës”, tha Osmani, njofton Presidenca. “Faza e re e dialogut, në të cilën po hyjmë duhet të udhëhiqet nga parimi i trajtimit të barabartë të palëve dhe të sigurojë se do t’i përfshijë çështjet të cilat janë në interes të qytetarëve tanë”.

Sipas Osmanit, ofrimi i informatave për personat e zhdukur me dhunë nga ana e Serbisë duhet të trajtohet shumë seriozisht, edhe për të treguar përkushtimin e shtetit serb ndaj synimeve të dialogut.

Po ashtu, Osmani tha se Serbia nuk ka zbatuar rreth 2/3 e marrëveshjeve të nënshkruara në Bruksel. Për më tepër, ajo shtoi se diskutimet për ndryshim territoresh janë të rrezikshme, sepse mund ta destabilizojnë tërë rajonin.

Osmani po ashtu ka shprehur shqetësimin për zvarritjen e procesit të liberalizimit të vizave.

“Presidentja ia shprehu edhe një herë z. Borell brengën e qytetarëve të Kosovës për zvarritjen e procesit të liberalizimit të vizave dhe procesin e integrimit të vendit, por edhe të rajonit, në Bashkimin Evropian. Sipas saj, Kosova ka bërë përparim të dukshëm, duke i plotësuar të gjitha kërkesat e BE-së ndaj nesh, prandaj është momenti që edhe BE-ja t’i mbajë premtimet e dhëna, t’i liberalizojë vizat për qytetarët tanë, si dhe ta përshpejtojë procesin e integrimit të vendeve të rajonit që plotësojnë kriteret në strukturat e BE-së, ngase kështu përforcohet edhe paqja dhe stabiliteti në rajon. Përfaqësuesi i Lartë i BE-së, z. Borell, ndërkaq, e njoftoi Presidenten Osmani me përgatitjet e BE-së për procesin e dialogut dhe shprehu besimin se procesi i nisur do të vazhdojë, për të arritur një marrëveshje të qëndrueshme mes dy vendeve”, thuhet nga Presidenca.